Хитай һөкүмити уйғур районида хитай бойичә әң чоң гөш калиси гуруһи қурмақчикән

Мухбиримиз җәвлан
2020-11-11
Share

"хитай хәвәрлири" ториниң 10-ноябир хәвәр қилишичә, хитай йеза-игилик тәрәққият банкиси шинҗаң шөбиси хуалиң гуруһиниң хитай бойичә әң чоң гөш калиси гуруһи болушиға ярдәм қилмақчи болған.

Хәвәрдә көрситилишичә, хуалиң гуруһи әслидә уйғур районида 30 йиллиқ тарихқа игә чоң ширкәт болуп, сода базири ечиш, ташқи сода, йүк тошуш, чәт әлгә мәбләғ селиш қатарлиқ кәсипләр билән шуғуллинип кәлгән; нөвәттә болса чарвичилиқ мәһсулатлири содисиға йүзлинип, или, алтай, чөчәк, байинғолин, ақсу, қәшқәр, хотән қатарлиқ җайларда зор көләмдики кала фермиси қурушни пиланлиған болуп, 60 миң кала бақидикән, буниңға салидиған мәблиғи 100 милйон йүәндин ашидикән.

"хитай хәвәрлири" ториниң 11-ноябир хәвәр қилишичә, хитай йеза-игилик тәрәққият банкиси хуалиң гуруһиға ярдәм бәргәндин башқа, шинҗаң банкисиму бу ширкәткә илгири-ахир болуп, 1 милярд йүән қәрз бәрмәкчи болған.

Көзәтчиләрниң қаришичә, хуалиң гуруһиниң уйғур районида бу зор көләмлик гөш калиси фермиси қуруши хитайдики һоқуқ-мәнпәәт гуруһиниң бу районниң байлиқи вә содисини монупул қилиш үчүн елип бериватқан һәрикити икән. Йәнә бир тәрәптин, хитай "бир бәлвағ бир йол" пиланиниң муһим түгүнигә җайлашқан уйғур районида хуалиң гуруһидәк чоң ширкәтләрни күчләндүрүш арқилиқ оттура асия дөләтлири вә мусулман дөләтләргә тәсир көрситишниму ойлашқан болуши мумкин икән.

Униңдин башқа алдинқи айларда хитай һөкүмәт таратқулири хәвәр берип, бай нәһийәси, ақсу конашәсәр наһийәси, чақилиқ наһийәси қатарлиқ уйғурлар нуқтилиқ олтурақлашқан бир қисим җайларда зор көләмлик чошқа бақмичилиқи фермилирини қурғанлиқини илгири сүргән иди. Хуалиң гуруһиниң бақмичилиқ нуқтилири бай наһийәсиниму өз ичигә алған болуп, көзәткүчиләр хуалиң гуруһиниң бақмичилиқ түридә чошқа бақмичилиқиниңму барлиқини тәхмин қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт