Kanada xitayning tokluq aptomobil, polat we alyumin mehsulatlirigha tamozhna béji qoyushni qarar qilghan

Xitayning tokluq aptomobil, polat-tömür we alyumin mehsulatliri amérika we yawropa ittipaqidin kéyin, kanadaningmu tamozhna béji qoyushigha duch kelgen. Kanadaning bu qarari amérika we yawropa ittipaqining bu mehsulatlargha tamozhna béji qoyushi xitayning öch élishi, amérika we yawropa ittipaqi bilen xitay arisida yéngi bir soda urushi partlashning signalliri chéliniwatqan bir peytte chiqirilghan. Roytérs agéntliqining bildürüshiche, kanada 26-awghust düshenbe küni xitay tokluq aptomobillirigha 100 pirsent, polat-tömür we alyumin mehsulatlirigha 25 pirsenttin baj qoyidighanliqini élan qilghan. Xitayning tokluq aptomobil we alyumin sana'iti nopuzluq chet'el tetqiqat orunliri teripidin Uyghur mejburiy emgiki merkezleshken sahelerning biri, bolupmu Uyghur mejburiy emgiki bu mehsulatlarning ruda ishlepchiqirish basquchigha merkezleshkenliki qeyt qilinip kelgenidi.

Amérika “Blumbérg xewerliri” de, kanada bash ministiri jastin trédowning bu pilanni kanadaning nowa-skotiye ölkisidiki halifaks shehiride ichki kabinét yighini chaqirip, iqtisadiy we tashqi soda siyasitini muzakire qilghanda otturigha qoyghanliqi qeyt qilinmaqta. Roytérs agéntliqining bildürüshiche, bash ministir trédow, kanadaning xitay meqsetlik élip bériwatqan dölet hamilidiki éshincha ishlepchiqirish siyasitige qarshi heriketke ötkenlikini éytqan. Jastin trédow, “Méningche, xitayning oxshash qa'idige emel qilmaywatqanliqini biz hemmimiz bilimiz” dégen. Melum bolushiche, kanada hökümitining qarari bu yil 1-öktebirdin bashlap resmiy ijra qilinishqa bashlaydiken. Kanadaning xitay bilen bolghan sodisi amérika bilen sélishturghanda köp arqida bolsimu, lékin xitay yenila kanadaning 2-chong soda shériki hésablinidu. Kanada wankowér portining tamozhna sanliq melumatliridin melum bolushiche, tésla shirkiti shangxeyde ishlepchiqarghan tokluq aptomobillirini kanadagha éksport qilishqa bashlighandin kéyin, 2023-yili xitaydin kanadagha import qilin'ghan tokluq aptomobil 460 pirsent artqan.