Kanada konsérwatiplar partiyesi Uyghurlarni qollishi sewebidin xitayning hujum nishani bolup qalghan

Washin'gtondin muxbirimiz erkin teyyarlidi
2024.04.01

Kanada konsérwatiplar partiyesining 2021-yilidiki saylamda, Uyghurlargha yardem bérishni wede qilishi sewebidin, xitayning hujumigha uchrighanliqi ilgiri sürüldi. Kanada CBC qanilining xewer qilishiche, guwahchilar konsérwatiplar partiyesining 2021-yili saylamda, eger özlirining hökümet qursa, Uyghurlarning irqiy qirghinchiliqqa uchrighanliqini étirap qilishqa wede qilishi, xitayning hujumigha uchrishigha seweb bolghanliqini bildürgen. Kanada chet elning arilishishini tekshürüsh komitétining ötken hepte ötküzülgen guwahliq yighinida Uyghur pa'aliyetchiler guwahliq bérip, bu partiyening yuqiriqi wedisi uning 2021-yilidiki saylamda xitayning hujumigha uchrishigha seweb bolghanliqini ilgiri sürgen. CBC Ning xewiride qeyt qilinishiche, guwahliq yighinida kanada “Uyghur heqlirini qoghdash qurulushi” ning ijra'iye diréktori memet toxti mundaq dégen: “Xitay hökümitini bu ishta qattiq telwiliki tutup”, “Konsérwatiplar partiyesige qarshi herikitini kücheytti.”

Memet toxtining qeyt qilishiche, uning teshkilati 2021-yildiki saylamda siyasiy partiyelerge bir qatar teleplerni sun'ghan bolup, ulardin konsérwatiplar partiyesi ulargha bezi wedilerni bergeniken. Xewerde, konsérwatiplar partiyesining hökümet qursa, Uyghur qirghinchiliqini étirap qilishni, ittipaqdash döletlernimu étirap qilishqa ilhamlandurushni we Uyghur mejburiy emgek mehsulatlirini chekleshni öz ichige alghan bezi wedilerni bergenliki qeyt qilinmaqta. Melum bolushiche, 2021-yilidiki saylamda bash ministir trudoning libérallar partiyesi parlaméntta eng köp orun'gha érishken bolsimu, emma hökümet qurush üchün yéterlik san'gha érishelmigen. Buning bilen u kanada yéngi démokratlar partiyesining qollishida az sanliqlarning hökümitini teshkil qilghan. Lékin kanada bixeterlik tarmaqlirining kanadadiki 2016- we 2021-yili ötküzülgen ikki qétimliq saylamgha xitayning qol tiqqanliqi heqqidiki doklati kanadaning bu yil 1-ayda tekshürüsh komitéti qurup, chet elning arilishishini tekshürüshige seweb bolghan. Tekshürüsh komitétining tunji guwahliq yighini ötken hepte ötküzülgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.