Kanada parlaménti teminlesh zenjiridiki mejburiy emgek mehsulatlirini cheklesh qanun layihesi maqullidi

Kanada parlaméntining awam palatasi 3-may küni teminlesh zenjiridiki mejburiy emgek mehsulatlirini chekleshke a'it S-211 namliq qanun layihesini maqullighan. Melum bolushiche, kéler yili 1-aydin bashlap resmiy ijra qilinidighan bu qanunda chong shirketlerning kanada tamozhna da'irilirige import mehsulatlirining mejburiy emgekke chétishliq yaki emeslikini melum qilishi telep qilin'ghan. Kanada amérikadin kéyin bu xil qanun chiqirip teminlesh zenjiridiki mejburiy emgek mehsulatlirigha qarita qanuni tedbir alghan 2-dölet bolsimu, lékin uning bu qanuni kishilik hoquq teshkilatliri teripidin amérikaningkidek küchlük emes, bu qanun Uyghur mejburiy emgek mehsulatlirini chekleshte ‍ünümlük bolmaydu, dep qaralmaqta.

Lékin “Wol schérét zhurnili” gézitining xewer qilishiche, mezkur qanunni sun'ghan bash ministir jastin trudoning libérallar partiyesidin bolghan parlamént ezasi jon mikay, bu qanun “Kanadani yershari qullar emgikige qarshi turush kürishide yétekchige aylanduridighanliqi” ni éytqan. Bu qanun ötken yili 12-ayda kanada kéngesh palatasi teripidin maqullan'ghan idi.

Melum bolushiche, bu qanunda peqet shirketlerning import mehsulatlirining mejburiy emgekke chétilmighanliqini élan qilishi we bu xil mehsulatlargha qarshi tedbir ‍élishi, uninggha xilapliq qilghanlargha 184 ming dollar jerimane qoyush telep qilin'ghaniken. Lékin tenqidchiler bu qanun shekilwazliq peyda qilip, mesilini téximu éghirlashturidighanliqini bildürmekte.

“Wol schérét zhurnili” ning éytishiche, “Kanada shirket mes'uliyitini sürüshtürüsh tori” teshkilatining siyaset diréktori émiléy dwayér: “Kanada shirketlirining mejburiy emgek we balilar emgikidin dawamliq payda alidighanliqi”, bu qanunning bu qilmishlarni tosushta “Héchqandaq qedem basmighanliqi” ni éytqan.