Kanada hökümitige Uyghur mejburiy emgikige chétilghan 7 xitay shirkitining déngiz mehsulatini cheklesh teklipi sunulghan

Washin'gtondin muxbirimiz irade teyyarlidi
2023.12.07

Kanadadiki ikki kishilik hoquq teshkilati kanada hökümitini Uyghur mejburiy emgikige chétilghan xitay déngiz mehsulatliri shirketlirige jaza qoyushqa chaqirghan.

7- Dékabir küni, kanadadiki “Uyghur heqlirini himaye qilish qurulushi” we “Kishilik hoquq herikiti guruppisi” (Human Rights Action Group) din ibaret ikki teshkilat, kanadaning yer shari ishliri ministirliqigha doklat sunup, ulardin Uyghur mejburiy emgikige chétilghanliqi ispatlan'ghan 7 xitay shirkitining mehsulatlirining kanadagha kirishini chekleshni telep qilghan.

Ular hökümetke yollighan bu teklipini “Qanunsiz déngiz herikiti” (The Outlaw Ocean Project) namliq musteqil tetqiqat orginining yéqinda élan qilin'ghan doklatigha asasen teyyarlighan. Bu organ bu yil 10-ayda 4 yilliq tekshürüsh netijiside az dégende 10 xitay déngiz mehsulati shirkitining Uyghur mejburiy emgikige chétilidighanliqi, shimaliy amérika bazirigha kiriwatqan déngiz mehsulatlirining zor qismining xitaydin kélidighanliqini ashkarilighan idi.

Kanada hökümitige teklip sun'ghan yuqiriqi ikki kishilik hoquq teshkilati kanada hökümitining 2021-yili xitayni közde tutup maqullighan alahide iqtisadiy tedbir qanuni (Special Economic Measures Act) boyiche Uyghur mejburiy emgikige chétilghan xitay shirketlirini jazalap, ularning mehsulatlirini kanada baziridin chekleshke chaqirghan.

Jaza qollinish tizimlikige élinishi telep qilin'ghan 7 xitay shirkiti yentey sanko béliqchiliq shirkiti, yentey longwin yémeklikliri, chishen goruhi, shendung méyjya goruhi, chingdaw tyenyüen su mehsulatliri, rongsénsé goruhi we shinjang jungtey jixuy mulazimiti qatarliq shirket we mu'esseselerdin ibaret iken. “Qanunsiz déngiz herikiti” teshkilati tekshürüshide peqet yentey sanko béliqchiliq shirkitining özidila 2018- yilidin béri az dégende ming neper Uyghur ishchining mejburiy ishlitilgenlikini qeyt qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.