Kanada hökümiti wolmart qatarliqlarning Uyghur mejburiy emgiki bilen bolghan alaqisini tekshürmekchi

 Kanadaning karxanilarni nazaret qilish orgini 24-awghust wolmart (Walmart) , hyugo bos (Hugo Boss) qatarliq shirketlerning kanada tarmiqining Uyghur mejburiy emgiki bilen bolghan alaqisini tekshüridighanliqini élan qilghan. Bu mezkur organning bu yil 5-aydin béri nayké (Nike) , kanada xan jemeti altunchiliq shirkiti, ralf lorén (Ralph Lauren) qatarliq shirketlerning Uyghur mejburiy emgiki bilen bolghan alaqisini tekshüridighanliqini élan qilishidin buyan, yene ikki dangliq xelq'araliq shirket üstidinmu tekshürüsh élip baridighanliqini jakarlishidur.

Roytérs agéntliqining xewer qilishiche, kanada karxanilarni nazaret qilish idarisi 24-awghust bayanat élan qilip, kanadadiki 28 teshkilatning ötken yili 6-ayda sun'ghan erz-shikayitige asasen, yuqiriqi ikki shirketke qarita özlirining deslepki bahalash doklatini élan qilghanliqini bildürgen.

Kanada karxanilarni nazaret qilish idarisining ashkarilishiche, mezkur organ yene italiyening OTB shirkitige qarashliq déyzél shirkiti üstidinmu tekshürüsh élip baridiken. Karxanilarni nazaret qilish idarisining bash nazaretchisi shéri méyérxofér 24-awghust élan qilin'ghan bayanatta, “Nöwette, terepler arisida muresse qilish mumkinchilik bolmighachqa, bu doklatta otturigha qoyulghan bayanlargha qarita tekshürüshni bashlaymiz” dégen. Lékin roytérs agéntliqining bildürüshiche, meyli hyogo bos yaki wolmart bolsun, her ikki shirket özlirining mejburiy emgek bilen alaqisi barliqini ret qilghan. Halbuki, hazirgha qeder Uyghur mejburiy emgikige chétishliq, dep eyiblen'gen héchqandaq bir xelq'araliq shirket biwasite yaki wasitilik bolsimu uninggha chétishliq ikenlikini étirap qilip baqmighan.

Roytérs agéntliqining éytishiche, wolmart shirkiti “Erz-shikayettiki héchqandaq bir orun özlirining aktip teminlesh zenjiri da'iriside emesliki” ni bildürgen. Hyugo bos bolsa ulargha qaritilghan “Eyibleshning héchqandaq asasi yoqluqi” ni ilgiri sürgen. Kanada karxanilarni nazaret qilish idarisining qeyt qilishiche, wolmart özige qaritilghan eyibleshni ret qilghan bolsimu, lékin uninggha qarita konkrét jawab bermigen.