Җастин трудо: «канада әмди хитайниң дипломатийә зораванлиқиға боюн әгмәйду»

Мухбиримиз ирадә
2020-10-15
Елхәт
Пикир
Share
Принт

Канада баш министири җастин трудо канаданиң әмди хитайниң дипломатийә зораванлиқиға, кишилик һоқуқни халиғанчә дәпсәндә қилишиға сүкүт қилмайдиғанлиқини билдүргән.

Канаданиң «йәршари вә почта» гезитиниң хәвәр қилишичә, канада баш министири җастин трудо юқириқи сөзләрни «канада-хитай дипломатик мунасивәт орнатқанлиқиниң 50 йиллиқи» ни хатириләш мунасивити билән қилған сөзидә ейтқан икән.

Җастин трудо сөзидә йәнә «халиғанчә қолға елиш, хоңкоң демократийәсини бастуруш вә мусулман аз санлиқ милләтлирини лагерларға қамаш» қатарлиқ васитиләр һәргизму «иҗабий чиқиш йоли әмәс» дәп хитайни агаһландурған. У йәнә канаданиң бундин кейин шерик дөләтләр билән зич һәмкарлишип, хитай һөкүмитиниң «мәҗбурлаш дипломатийиси» гә тақабил туридиғанлиқини билдүргән. У сөзидә хитай тәрипидин гөрүгә еливелинған икки нәпәр канада пуқрасиниң мәсилисиниму тилға алған.

Бу һазирғичә хитайни очуқ-ашкара тәнқид қилишта иккилинип кәлгән канада баш министириниң тунҗи қетим хитайни уйғур елидики лагерлар мәсилиси вә хоңкоң мәсилисидә бундақ очуқ вә кәскин һалда тәнқид қилиши болуп һесаблинидикән.

У шу күнидики сөзидә йәнә мундақ дегән: «хитай һазир дунядики иккинчи чоң иқтисадий гәвдә болуп, канада қатарлиқ башқа дөләтләргә көрүнәрлик иқтисадий тәсири бар. Һөкүмитимиз бейҗиң билән болған содиниң давам қилишини үмид қилсиму, әмма дәриҗидин ташқири чоң коммунист реҗимға мунасивәтлик кишилик һоқуқ мәсилисидә сүкүт қилмайду. Биз дуняниң һәрқайси җайлиридики охшаш пикирдики дөләтләр билән давамлиқ һәмкарлишип, хитайға униң ички ишлар вә йәр шари ишлириға тутқан позитсийисиниң хитайниң өзи үчүн вә һәммимиз үчүн иҗабий йол әмәсликини билдүримиз.»

Ройтерс агентлиқиниң хәвәр қилишичә, хитай ташқи ишлар министирлиқи 14-өктәбир күни канада баш министириниң сөзлиригә наразилиқ билдүргән. Хитай ташқи ишлар министирлиқиниң баянатчиси җав лиҗйән канада һөкүмитини «ялғанчилиқ қилди» дәп әйиблигән.

Пикирләр (0)
Share
Толуқ бәт