Kanada tewelikidiki xitay puqrasi téslaning soda mexpiyetlikini oghrilighanliqini iqrar qilghan

Washin'gtondin muxbirimiz erkin teyyarlidi
2024.06.14

Kanada tewelikidiki bir xitay puqrasi 13-iyun küni amérikaning nyu-york shehiridiki fédératsiye sot mehkimiside tésla tokluq aptomobil bataréyesining soda mexpiyetlikini oghrilighanliq jinayitini iqrar qilghan.

Amérika edliye ministirliqining bildürüshiche, 58 yashliq kanada tewelikidiki bu kishi, yene bir xitay puqrasi bilen birliship, téslaning soda mexpiyetlikini xéridar qiyapitige kiriwalghan amérika hökümet agéntlirigha satmaqchi bolghanda qolgha élin'ghan iken. Kla'us flugbé'il isimlik kanada tewelikidiki bu xitay puqrasining öz nöwitide yene gérmaniye tewelikide ikenliki, lékin uning shaw yilong isimlik xitay tewelikidiki shériki téxiche qéchip yürgen bolsimu, emma uning bilen oxshash jawabkarliqqa tartilghanliqi qeyt qilinmaqta. Amérikaning yardemchi edliye ministiri metyw olsén “Flugbé'il jinayitini iqrar qilghanliqi, uning emdi dölet bixeterlikimizge buzghunchiliq qilishtek qanunsizliq qilmishidin jawabkarliqqa tartilidighanliqi” ni éytqan.

Melum bolushiche, nöwette kla'us flugbé'il eng köp bolghanda 10 yilliq qamaq jazasigha höküm qilinishi mumkin iken. Amérika fédératsiye teptish emeldari bré'on pis, “Bügünki jinayet iqrari teptish organimizning amérika shirketlirining eqliy mülkini oghrilighan kishilerni qanchilik téz qanuniy jawabkarliqqa tartip, bizning iqtisad we dölet bixeterlikini qoghdaydighanliqimizni körsitidu” dégen.

Amérika teptish da'irilirining körsitishiche, flugbé'il bilen shaw yilong “Amérikaning aldinqi qatardiki tokluq aptomobil shirkiti” din oghrilighan soda mexpiyetlikige tayinip özlirining tokluq aptomobil bataréyesi shirkitini qurup chiqqan iken. Amérika teptish da'iriliri bu ikkiylenning qaysi shirketning soda mexpiyetlikini oghrilighanliqini ashkarilimighan bolsimu, emma taratqular uning tésla shirkiti ikenlikini ilgiri sürmekte. Melum bolushiche, bu ikkiylen soda mexpiyetlikini oghrilighan kanadadiki tokluq bataréye karxanisini 2019-yili tésla shirkiti sétiwalghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.