Җастин трудо йәнә бир қетим уйғурлар түпәйлидин һуҗум нишаниға айланди

Мухбиримиз әзиз
2021-03-30
Share

Уйғур дияридики мәҗбурий әмгәкниң көлими вә дәриҗиси һәққидики әң йеңи учурларниң көпләп ашкара болуши билән бу хил "заманиви қуллар әмгики" ниң мәһсулатлириға асаслиқ базар болуватқан ғәрб дунясида бу малларни чәкләш һәрикити барғансери юқири пәллигә чиқишқа башлиди. Канада баш министири җастин трудо 30-март күни баянат елан қилип, өзлириниң бу хил мәҗбурий әмгәк мәһсулатлирини чәкләш қарарини иккиләнмәстин давам қилидиғанлиқини билдүрди.

Канаданиң әң чоң гезитлиридин болған "йәр шари почтиси" гезитиниң 30-марттики хәвиридә ейтилишичә, нөвәттә канада базарлирида сетиливатқан лөңгә, йотқан кирликлири вә кийим-кечәкләрниң көп қисми уйғур дияридики пахта мәһсулатлириға четишлиқ мәҗбурий әмгәкниң мәһсулатлири икән. Баш министир җастин трудо мушу әһвалларни көздә тутуп "биз әмәлий һәрикәткә өттуқ. Шуниңдәк мушу арқилиқ канада ширкәтлириниң мәнбәси гуманлиқ болған тәминат зәнҗирлиригә четилип қалмаслиқини, бу ширкәтләрниңму өзини айишини истимәктимиз" дегән.

Хәвәрдә ейтилишичә, 2021-йилиниң бешида канада һөкүмити хитайдики мәҗбурий әмгәккә бағлинишлиқ болған мәһсулатларни импорт қилмаслиқ, канада ширкәтлири мәҗбурий әмгәк билән алақидар сода паалийәтлиригә иштирак қилмаслиқ, шуниңдәк канада ташқи сода импортиниң мәҗбурий әмгәкни асас қилған тәминат зәнҗиригә шерик болуп қелишиға йол қоймаслиқ дегәндәк бир қатар қарарларни алған икән. Канададики йәнә бир қисим сиясиийонлар болса "канада һөкүмити хитайдин импорт қилиниватқан барлиқ пахта вә пәмидур (шохла) мәһсулатлирини мәни қилиши лазим" дәп көрсәткән.

"микрософт хәвәрлири" ниң 30-марттики хәвиридә ейтилишичә, җастин трудо бирләшкән дөләтләр тәшкилати (б д т) ниң баш шитабидики мухбирларни күтүвелиш йиғинида йәнә бир қетим уйғурлар һәққидә узун сөз қилған. У сөзидә "шинҗаңда һазир болуватқан ишларниң еғирлиқидин бәкла тәшвишләнмәктимиз. Хитай һөкүмити буниңға тездин җаваб бериши лазим" дәп көрсәткән һәмдә өзиниң хитайға қаритилған җаза тәдбирлирини қизғин қоллайдиғанлиқини билдүргән.

Әмма баш министир җастин трудониң сөзлири тарқилип узун өтмәйла бразилийәниң роди-жанейро шәһиридики хитай консулханисиниң баш консули ли яң тиветтерда учур йоллап ; "йигит! нәччә вақиттин буян қилған-әткәнлириң пәқәт хитай-канада мунасивитини бузуш һәмдә канадани американиң ғалчисиға айландуруш болди" дәп, униңға һақарәт қилған. Хәлқарадики һәр саһә кишилири болса буни хитайниң дипломатийә саһәсидики калваларчә мәғлубийәтниң йәнә бир қетим ашкарилиниши, дәп қаримақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт