Хитайниң канададики сиңип кириш һәрикити диққәт қозғимақта

Мухбиримиз әзиз
2021-06-01
Share

Хитай һөкүмитиниң нөвәттә иқтисадий козир арқилиқ канада тәвәсидә сиңип киришни җиддийләштүрүши йеңи басқучқа көтүрүлүватқан болуп, йеқиндин буян уйғур вә тибәт паалийәтчиләрниң паракәндичиликкә учраватқанлиқи көпләп мәлум болушқа башлиди.

"йәр шари вә почта" гезитиниң 31-майдики баш мақалисидә көрситилишичә, хоңкоң демократчилириниң аммиви тәшкилатлиридин болған "канада-хоңкоң иттипақи" йеқинда тәйярлиған доклатта "канададики бир қисим паалийәтчиләр хитай компартийәсиниң ‹сиясий артистлири' вә хитай милләтчилириниң биваситә яки васитилик һуҗумлириға учраватиду. Бу һуҗумларниң арқисида хитай компартийәсиниң қоли мәвҗут" дейилиду.

Доклатта көрситилишичә, хитайниң бирликсәп тармақлириға қарашлиқ шәхсләрниң қоманданлиқида канада тәвәисидә хитай һөкүмитигә қарши түрлүк паалийәтләр, җүмлидин уйғурлар вә тибәтләрниң йиғилишлири, нутуқ сөзләш паалийәтлири һәрқачан хитай һөкүмити "пәрдә арқисидин башқуруватқан" кишиләрниң тәһдитлири яки паракәндичиликигә учриған.

Буниңда алаһидә диққәт қозғайдиған бир нуқта хитай һөкүмитиниң иқтисадий ярдимигә "моһтаҗ" болуватқан бир қисим алий мәктәпләрниң өзлириму туймиған һалда хитайниң сиңип кириш паалийитигә сорун һазирлап бериш болмақта икән. "хәвәрләр" торида елан қилинған бу һәқтики мақалида канада алий мәктәплириниң мушу әһвали кәскин тәнқидлинип "алий мәктәпләрниң хитайдин иқтисадий ярдәмгә еришиши әмәлийәттә милйонлиған уйғурни қирғин қиливатқан бир һакимийәткә шерик болғанлиққа баравәр" дейилиду. Шуниңдәк канада алий мәктәплириниң хитай пән-техника ширкәтлири билән болған һәмкарлиқиниң ақивәттә ирқий қирғинчилиққа васитилик һалда ярдәм бериш болуп қалидиғанлиқи алаһидә тәкитлиниду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт