Хәлқара кәчүрүм тәшкилати: “хитай һөкүмитиниң уйғурларни бастуруватқанлиқини йошурғудәк йери қалмиди”

Мухбиримиз әркин
2018-10-26
Share

Хәлқара кәчүрүм тәшкилати 25‏-өктәбир атақлиқ уйғур зиялийси илһам тохтиниң туғулған күни мунасивити билән мақалә елан қилип, униңға һәмдәм болидиғанлиқи вә униң күрәш нишанини қоллайдиғанлиқини билдүрди.

“хитай һөкүмитиниң шинҗаңдики уйғур мусулманлирини бастуруватқанлиқини йошурғудәк йери қалмиди” сәрләвһилик мақалида хитай даирилириниң райондики уйғурларни, шуниңдәк башқа диний вә етник гуруппиларни бастуруш һәрикити уйғур аптоном райониниң вәзийитини қорқунчлуқ һалға кәлтүрүп қойғанлиқи тәкитләнгән.

Мақалидә йәнә хитайниң бу райондики вәһшийләрчә бастурушиға қаримай, йиғивелиш лагерлири билән йәрлик мәдәнийәтни йоқитиш қилмишлирини давамлиқ түрдә инкар қиливатқанлиқи билдүрүлгән.

Мақалида гәрчә хитай өзиниң қилмишини инкар қиливатқан болсиму, лекин буниң растлиқи нурғун кишиләр тәрипидин дәлилләнгәнлики әскәртилип, мундақ дейилгән: “буниңдики җавабкарлиқ чоқум сүрүштүрүлүши, уйғурларниң қайта бастурулуш нишаниға айлинип қалмаслиқиға капаләтлик қилиниши керәк. Кеңәш палата әзаси марку рубийо өзиниң ‛вол-стрет журнили‚ гезитидә елан қилған мақалисидә ейтқинидәк америка дөләт мәҗлиси вә хәлқара җәмийәт аилиләрниң айриветилиши, тән җазаси, һәтта өлтүрүлүшигә әмди қарап турмаслиқи лазим. Америка рәһбәрлири бу рәзилликкә қарши сиясий ирадисини оттуриға қоюши керәк.”

Мақалида тәкитлинишичә, америка ташқи ишлар министирлиқи башқа һөкүмәтләр билән бирлишип, б д т вә башқа хәлқара органларда хитайға қаритилған бесимни күчәйтиши, шинҗаңдики қорқунчлуқ кишилик һоқуқ дәпсәндичиликигә қарши җамаәт пикири топлап, униңға йәр шариниң диққитини тартиши керәк икән.

Мақалиниң ахирида кишиләрни илһам тохтини қоюп беришни тәләп қилиш илтимасиға қол қоюшқа, уйғур аптоном районлуқ 1‏-түрмигә аткритка әвәтип, униң туғулған күнини тәбрикләшкә чақирған.

Илһам тохти уйғурларниң хитай асаси қанунидики һәқ-һоқуқлирини тәләп қилғанлиқи үчүн 2014‏-йили 1‏-айда қолға елинған. Шу йили 9-айда “бөлгүнчилик” билән әйиблинип, муддәтсиз қамақ җазасиға һөкүм қилинған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт