Amérika kéngesh palata ezaliri qarar layihisi sunup, 2022‏-yilliq qishliq olimpikning xitayda ötküzülmeslikini telep qildi

Muxbirimiz erkin
2020-03-09
Share

Amérika kéngesh palatasining 11 neper ezasi ötken hepte qarar layihesi sunup, 2022‏-yilliq qishliq olimpik musabiqisining bir milyondin artuq Uyghur we bashqa musulmanlarni tutqun qilghan xitaydek bir dölette ötküzülmeslikini telep qilghan. Qarar layihiside, xelq'ara olimpik komitétining béyjing qishliq olimpik musabiqisini bashqa döletke yötkishi telep qilin'ghan.

Mezkur qarar layihisini amérika kéngesh palata ezasi rik skot bilen ed markéy sun'ghan bolup, uninggha jim inxof, dik durbén, marta miksaléy, dow jonés, marku rubi'o, tam katton qatarliq ezalar imza qoyghan. Qarar layihiside, olimpik musabiqisining kishilik hoquqqa, insanlarning izzet-étibarigha hörmet qilidighan bir dölette ötküzülüshi kérekliki, lékin xitayning "Bir milyondin artuq Uyghur, qazaq, qirghiz qatarliq musulmanlarni tutqun qilip, diniy kimlikni yoqitish meqsitide qurulghan 1200 dek 'kespiy terbiyelesh merkezliri' namidiki yighiwélish lagérlirigha qamighanliqi" tekitlen'gen. Qarar layihiside yene "Xitay hökümitining qoshmaq tughqan we bir a'ile bolush programmisini yolgha qoyup, xitay erkek "Tughqanlar" ni shinjang Uyghur aptonom rayonidiki Uyghur a'ililerni nazaret qilishqa we yighiwélish lagérliridiki erkeklerning ayalliri bilen qerellik bir orunda yétishqa orunlashturghanliqi, buninggha naraziliq bildürgen a'ililerning teqibleshke we yighiwélish lagérlirigha qamilishi mumkinliki" bildürülgen.

Kéngesh palata ezasi jim inxof özining néme üchün mezkur qarar layihesige imza qoyghanliqi heqqide toxtilip, "Xitay kompartiyesi junggo xelqige dawamliq zulum qiliwatidu, biz buni shinjangdiki 'qayta-terbiyelesh' lagérlirida we shyanggangda éniq körduq. Men 2022-yilliq qishliq olimpik musabiqisining béyjingda ötküzülüp, kompartiyening qilmishigha kengchilik qilishning héchqandaq sewebini körüp baqmidim" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet