Керийә наһийәсидә 6.4 Бал йәр тәвригән, лагерлардики уйғурларниң бихәтәрликигә болған әндишә күчәйгән

26-Июн күни хотән вилайитиниң керийә наһийәсидә 6.4 Бал йәр тәвригән. Хитай таратқулириниң хәвәрлиридә йәр тәврәшниң аһалилар районлириға йирақ тағлиқ районда йүз бәргәнликин илгири сүрүлсиму, лекин бу чәтәлдики уйғурларда йәр тәврәш райониға йеқин лагер яки хитай завутлиридики тутқунларниң бихәтәрликигә болған әндишини күчәйтти.

Хитай таратқулирида бу қетимлиқ йәр тәврәштә һазирға қәдәр өлүм-йитим келип чиққанлиқиға даир һечқандақ учур йоқлуқи тәкитләнгән. “тәңритағ” ториниң билдүрүшичә, йәр тәврәш керийә вақти 26-июн әтигән саәт 5 тин 5 минут өткәндә йүз бәргән болуп, йәр тәврәш мәркизи керийә нашийәсидики атчан йезисиға қарашлиқ адәмсиз тағлиқ районда икән.

Атчан йезисиниң пешигәй кәнти йәр тәврәш мәркизигә әң йеқин кәнт болуп, хитай таратқулирида бу кәнтниң йәр тәрврәш мәркизигә 86 километир келидиғанлиқи илгири сүрүлгән. Бу мәзкур наһийидә 2014-йилдики йәр тәврәштин кейин йүз бәргән әң қаттиқ тәврәш болуп, өткән қетимқи йәр тәврәш мәркизиму атчан йезисидики тағлиқ районида иди. Лекин өткән қетимлиқ йәр тәврәштә уйғур хәлқи өзлүкидин тәшкиллинип, йәр тәврәш райониға ярдәм бериш сәпәрвәрлик һәрикити елип барған. Шу қетимқи сәпәрвәрлик һәрикитидә актип рол ойниған нурғун уйғурлар хитайниң 2017-йили башланған чоң тутқунида лагерларға елип кетилгән яки из-дерәксиз ғайиб болған иди.

“тәңритағ” ториниң хәвиридә йәр тәврәштин кейин уйғур аптоном районлуқ партком вә һөкүмәтниң дәрһал қутқузуш тәдбирлирини алғанлиқини билдүргән болсиму, бирақ конкрет қандақ тәдбирләрни алғанлиқи, апәткә учриған амминиң әһвали, учриған зийини, уларниң қандақ ярдәмгә еһтияҗлиқ икәнлики қатарлиқ һалқилиқ мәсилиләр һәққидә һечқандақ учур берилмигән. Хитай таратқулириниң билдүрүшичә, бүгүнки 1-қетимлиқ йәр тәврәштин кейин районда йәнә бир қанчә қетим қалдуқ йәр тәвригән.