Kériye nahiyeside 6. 4 Bal yer tewrigen, lagérlardiki Uyghurlarning bixeterlikige bolghan endishe kücheygen

Muxbirimiz erkin
2020-06-26
Share

26-Iyun küni xoten wilayitining kériye nahiyeside 6.4 Bal yer tewrigen. Xitay taratqulirining xewerliride yer tewreshning ahalilar rayonlirigha yiraq taghliq rayonda yüz bergenlikin ilgiri sürülsimu, lékin bu chet'eldiki Uyghurlarda yer tewresh rayonigha yéqin lagér yaki xitay zawutliridiki tutqunlarning bixeterlikige bolghan endishini kücheytti.

Xitay taratqulirida bu qétimliq yer tewreshte hazirgha qeder ölüm-yitim kélip chiqqanliqigha da'ir héchqandaq uchur yoqluqi tekitlen'gen. "Tengritagh" torining bildürüshiche, yer tewresh kériye waqti 26-iyun etigen sa'et 5 tin 5 minut ötkende yüz bergen bolup, yer tewresh merkizi kériye nashiyesidiki atchan yézisigha qarashliq ademsiz taghliq rayonda iken.

Atchan yézisining péshigey kenti yer tewresh merkizige eng yéqin kent bolup, xitay taratqulirida bu kentning yer terwresh merkizige 86 kilométir kélidighanliqi ilgiri sürülgen. Bu mezkur nahiyide 2014-yildiki yer tewreshtin kéyin yüz bergen eng qattiq tewresh bolup, ötken qétimqi yer tewresh merkizimu atchan yézisidiki taghliq rayonida idi. Lékin ötken qétimliq yer tewreshte Uyghur xelqi özlükidin teshkillinip, yer tewresh rayonigha yardem bérish seperwerlik herikiti élip barghan. Shu qétimqi seperwerlik herikitide aktip rol oynighan nurghun Uyghurlar xitayning 2017-yili bashlan'ghan chong tutqunida lagérlargha élip kétilgen yaki iz-déreksiz ghayib bolghan idi.

"Tengritagh" torining xewiride yer tewreshtin kéyin Uyghur aptonom rayonluq partkom we hökümetning derhal qutquzush tedbirlirini alghanliqini bildürgen bolsimu, biraq konkrét qandaq tedbirlerni alghanliqi, apetke uchrighan ammining ehwali, uchrighan ziyini, ularning qandaq yardemge éhtiyajliq ikenliki qatarliq halqiliq mesililer heqqide héchqandaq uchur bérilmigen. Xitay taratqulirining bildürüshiche, bügünki 1-qétimliq yer tewreshtin kéyin rayonda yene bir qanche qétim qalduq yer tewrigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet