Кишилик һоқуқ көзитиш тәшкилати ташқи дуняни адвокат җяң тйәнюңниң әһвалиға җиддий диққәт қилишқа чақирди

Мухбиримиз әркин
2017.01.06

Кишилик һоқуқ көзитиш тәшкилати пәйшәнбә күни баянат елан қилип, ташқи дуняни йеқинда қолға елинған атақлиқ хитай кишилик һоқуқ адвокати җяң тйәнюңниң әһвалиға җиддий диққәт қилишқа чақирди.

Кишилик һоқуқ көзитиш тәшкилатиниң билдүрүшичә, җяң тйәнюңниң түрмидә тән җазаси вә башқа кәмситиш характерлик муамилиләргә учраш еһтимали бар икән.

Җяң тйәнюң өткән йили 11‏-айда чаңшада из‏-дерәксиз йоқап кәткән. Кейинрәк униң хитай аманлиқ органлири тәрипидин “ һакимийәтни ағдурушқа қутратқулуқ қилиш” билән әйиблинип, чаңшадики мәлум бир орунда тутуп турулуватқанлиқи мәлум болған.

Әмма, ташқи дуня униң әһвалидин һазирға қәдәр һечқандақ учур алалмиған иди. Җяң тйәнюңниң адвокати өткән йили 27‏-декабир даириләрдин униң билән көрүшүшни тәләп қилған. Әмма даириләр адвокатниң көрүшүш тәлипини рәт қилған иди.

Кишилик һоқуқ көзитиш тәшкилати баянатида йәнә, хитай һөкүмитини җяң тйәнюңниң әһвалини ашкарилашқа чақирип, әгәр хитай һөкүмити униң җинайәт садир қилғанлиқиға даир хәлқара бирдәк етирап қилған ишәнчлик бир пакитни оттуриға қоялмиса, униң адил вә хәлқара өлчәмләргә лайиқ сотлинишини сақлиялмиса, униң дәрһал қоюп берилиши керәкликини тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.