Уйғур кишилик һоқуқ қурулуши: «уйғурлар мәсилисигә четилидиған хитай әмәлдарлар чоқум җазалиниши керәк»

Мухбиримиз сада
2019-06-26
Елхәт
Пикир
Share
Принт

Уйғур дияридики еғир кишилик һоқуқ дәпсәндичиликигә биваситә четишлиқ болған хитай әмәлдарлириниң «йәршари магнетиский қануни» бойичә җазалиниш тәшәббуси күнсайин ешиватқан бир мәзгилдә 25-июн уйғур кишилик һоқуқ қурулуши бу һәқтә бир баянат елан қилди.

25-Июн күни мәзкур тәшкилат елан қилған «уйғур вә башқа түркий милләтләрни хорлашқа четишлиқ хитай әмәлдарлири чоқум җазалиниши керәк» сәрләвһилик баянатта америка һөкүмитини уйғур дияридики кишилик һоқуқни дәпсәндә қилған «хитай җинайәтчиләр» гә «йәршари магнетиский қануни» ни тәтбиқлашқа чақирған.

Баянатта уйғур кишилик һоқуқ қурулушиниң директори өмәр қанат әпәндиниң сөзлири нәқил елинған. У мундақ дегән: «нөвәттә хитай һөкүмитиниң уйғур дияридики уйғур вә башқа түркий милләтләрни җаза лагерлирида қийин-қистаққа елиши һәққидә толуқ дәлил-испатлар бар. Лагердин қутулуп чиққанларниң шу йәрдә өлгәнләр һәққидә бәргән гуваһлиқи шу җинайәтни садир қилғучиларниң әпти-бәширисини көрситип бәрмәктә. ‹Йәршари магнетиский қануни' ниң хитай әмәлдарлирини җазалашни нишан қилиши бир әмәлий иш болупла қалмай, кәлгүсидә пәйда болмақчи болған мушундақ җинайәтләрниң алдини елиш үчүн бир сигнал болалайду.»

Баянатта йәнә йеқиндин буян елан қилинип келиватқан доклатлардин җаза лагерлирида тутуп турулуватқан уйғур тутқунларниң җисманий вә башқа җәһәтләрдин изчил хорлуққа учраватқанлиқини көрүвалғили болидиғанлиқи, буниң типик мисали болса язғучи нурмуһәммәт тохтиниң лагерға елип кетилгәндин кейин бәш ай давалиништин мәһрум қалғанлиқи, лагердин қоюп берилип бир айдин кейин җан үзгәнлики ейтип өтүлгән.

Баянатниң ахирида «йәршари магнетиский қануни» бойичә уйғур дияридики җаза лагериниң баш «лайиһәлигүчиси» болған уйғур аптоном районлуқ парткомниң секретари чен чүәнгониң америкиға виза елип киришиниң чәклиниши вә униң чәтәлдики мал-мүлүклириниң тоңлитилиши керәклики тәшәббус қилинған.

Пикирләр (0)
Share
Толуқ бәт