Uyghur kishilik hoquq qurulushi 5-iyul ürümchi qirghinchiliqining 12 yilliqi munasiwiti bilen bayanat élan qildi

2009-Yili 7-ayning 5-küni yüz bergen 5-iyul ürümchi qirghinchiliqining 12 yilliq xatire küni munasiwiti bilen amérikadiki Uyghur kishilik hoquq qurulushi bayanat élan qildi.

Ular bayanatida 5-iyul ürümchi qirghinchiliqi yüz berginige 12 yil tolghan we Uyghurlargha irqiy qirghinchiliq yürgüzülüwatqanliqigha 5 yil bolghan mushu mezgillerde xelq'araning héch bolmighanda bu zulumdin qéchip chiqqan Uyghur musapirlar we panahlan'ghuchilarning bixeterlikige kapaletlik qilishi kéreklikini tekitligen.

Uyghur kishilik hoquq qurulushi ijra'iye diréktori ömer qanat mundaq dégen: “Dunya jama'iti héch bolmighanda Uyghur musapirlirini qutquzushi kérek. Amérika dölet mejlisi tézdin Uyghur kishilik hoquqini qoghdash qanunini maqullishi kérek we oxshash pikirdiki döletlermu Uyghur musapirlarni orunlashturush pilanini otturigha qoyushi kérek”.

Uyghur kishilik hoquq qurulushi bayanatida yene, 5-iyul ürümchi qirghinchiliqi we uningdin kéyinki basturush heriketlirining Uyghurlarni yurtlirini tashlap qéchishqa we dunyaning herqaysi jaylirida sersan-sergerdan bolushigha yol achqanliqini, biraq xitay hökümitining qolini chet'ellergimu uzitip, nurghun Uyghurlarni qayturup kétip dölet halqighan zulum bilen shughullan'ghanliqini tekitligen.

Uyghur kishilik hoquq qurulushi yéqinda mushu heqte mexsus élan qilghan doklatida, 2014-yildin bashlap 20 dölettin qayturuwétilgen1327 kishini arxiplashturghan.