Көлин шәһириниң “җуңго байрими” кишилик һоқуқ паалийәтчилириниң қаршилиқиға учриди

Мухбиримиз әркин
2017.08.25

Германийәдики көлин шәһириниң 25‏-авғуст башланған “җуңго байрими” паалийити хәтәр астидики хәлқләр җәмийити, хәлқара кәчүрүм тәшкилати қатарлиқ кишилик һоқуқ органлириниң қаршилиқиға учриди.

Мәзкур паалийәт хитайниң бейҗиң шәһири билән германийәниң көлин шәһири өз-ара ача-сиңил мунасивити орнатқанлиқиниң 30 йиллиқини тәбрикләш мунасивити билән уюштурулған. Илгири хәлқара кәчүрүм тәшкилати қатарлиқ органлар көлин шәһириниң “җуңго байрими” ни бикар қилишни тәләп қилған. Бирақ, көлин шәһәр башлиқи бу тәләпни рәт қилған иди.

Хәлқара кәчүрүм тәшкилати көлин шөбисиниң мәсули себастян барш бу йил 7‏-айда көлин шәһириниң башлиқи һенретте рекер ханимға мәктуп йезип, хитай һөкүмити кишилик һоқуққа хилаплиқ қиливатқан әһвалда, “тәбрикләш паалийити өткүзүшниң һечқандақ сәвәби йоқ” лиқини тәкитлигән.

25‏-Авғуст “җуңго байрими” башланған күни хәлқара кәчүрүм тәшкилати, хәтәр астидики хәлқләр җәмийити қатарлиқ тәшкилатлар тәбрикләш паалийитиниң асаслиқ мәркизи-ронкалиплатз мәйданиниң йенидики ворлоф мәйдани вә шу йәрдики бир черкав алдида наразилиқ паалийити өткүзгән.

Хәтәр астидики хәлқләр җәмийитиниң рәиси улрих делиус бир қанчә күн аввал радийомизға сөһбәт елан қилип, “бу паалийәт арқилиқ көлин хәлқигә хитайниң кишилик һоқуқни дәпсәндә қиливатқанлиқини, уйғур, тибәт қатарлиқ милләтләрни һәқ-һоқуқлириға еғир бузғунчилиқ қиливатқанлиқини йәткүзүшни үмид қилимиз” дегән иди.

Германийә ахбаратиниң хәвәр қилишичә, күлин шәһәрлик һөкүмәтниң баянатчиси инге шүрман “ғәрбий германийә телевизийә қанили” ға қилған сөзидә, күлин шәһириниң илгири “җуңго байрими” ни бикар қилишни ойлашқанлиқини, бирақ ахирида йәнила өткүзүш қарариға кәлгәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.