B d t kishilik hoquq kéngishide xitayning Uyghurlar we tibetlerge qaritilghan siyasiti tenqid qilindi

Birleshken döletler teshkilati kishilik hoquq kéngishining jenwede chaqirilghan 30-nöwetlik omumiy yighinida yawropa ittipaqi we amérika xitayning Uyghurlar we tibetlerge qaratqan siyasitini qattiq tenqid qilghan.

Xelq'ara tibet pochtisining xewer qilishiche, yighinda aldi bilen yawropa ittipaqi wekili jin mark xosshit ependi söz qilip, xitaydiki kishilik hoquq aktiplirigha qaritilghan keng kölemlik tutqun qilish heriketlirining xitayning döletni qanun arqiliq idare qilishni kücheytish heqqidiki wedisige shek keltürüwatqanliqini bildürgen. U shundaqla xitay hökümitidin türmidiki lyu shawbo, ilham toxti, gaw yü we pu jichyang qatarliqlarni derhal azad qilishni telep qilghan.

Yawropa ittipaqi wekili sözi axirida, xitaydin Uyghur éli we tibettiki milliy mesilini esli yiltizini tépip chiqip hel qilishni, Uyghurlar we tibetler bilen söhbet ötküzüshni eskertken.

Amérikining kishilik hoquq kéngishidiki da'imliq wekili kéyis xarpér ependimu bayanatida, xitaydin ilham toxti we lyu shawbolarni qoyuwétishni, Uyghur éli we tibettiki diniy cheklimilirini bikar qilishni telep qilghan.

Melum bolushiche yighinda yene, gérmaniye, irélandiye, gollandiye, firansiye, en'gliye, shwétisariye qatarliq döletlermu bayanat bérip, özlirining Uyghurlar we tibetlerning weziyiti heqqidiki endishilirini otturigha qoyup ötken.

Dunya Uyghur qurultiyining wekili dolqun eysa yighin'gha qatnashqan.