Кишилик һоқуқ тәшкилатлири “уйғур мәҗбурий әмгикини чәкләш қанун лайиһәси” ниң мақуллиниши мумкинликини билдүргән

Мухбиримиз әркин
2020.12.07

Кишилик һоқуқ тәшкилатлири америка кеңәш палатасиниң зор еһтималлиқ билән “уйғур мәҗбурий әмгикини чәкләш қанун лайиһиси” ни мақуллиши мүмкинликини билдургән. “сода ички учурлири” ториниң хәвәр қилишичә, америка дөләт мәҗлисидики хадимлар қанун лайиһәсиниң кеңәш палатасида мақуллинип, трамп яки байден һөкүмити дәвридә қанунға айлиниши мумкинликини илгири сүргән. Хәвәрдә йәнә кишилик һоқуқ тәшкилатлириниң қанун лайиһиси кеңәш палатасида мақуллиниши үчүн йетәрлик авазға игә, дәп корсәткәнлики тәкитләнгән.

Хәвәрдә тәкитлинишичә, америкадики “ишчилар һоқуқи бирләшмиси” ниң директори скот нова “сода ички учурлири” ға сөз қилип, “бу қанунға қарши туридиған дөләт мәҗлиси әзалириниң санақлиқ бир қанчә киши” икәнликини билдүргән. Бу қанун лаһийәси бу йил 9-айда авам палатасида 3 кә қарши 406 аваз билән мақуллинип, кеңәш палатасиға сунулған. Қанун лайиһәсидә ширкәтләрниң уйғур елидә ишләпчирилған мәһсулатларни импорт қилиши үчүн униң мәҗбури әмгәккә четилмиғанлиқини испатлиши тәләп қилинған.

Йеқинда “ню-йорк вақти” гезити бәзи чоң ширкәтләрниң лобийчилар, йәни дәллалларни яллап, америка дөләт мәҗлисидә бу қанунға қарши һәрикәт елип барғанлиқини илгири сүргән. “сода ички учурлири” ниң тәкитлишичә, скот нова “бу қанун лайиһәсини аҗизлитишқа тиришиватқан ширкәтләр өзлириниң бундақ испат көрситәлмәйдиғанлиқиға ишиниду” дегән. Йеқинда уйғур кишилик һоқуқ қурулушиниң ташқи ишлар директори луиса греве қанун лайиһисиниң мушу ай ичидә мақуллинишида үмид барлиқини билдүргәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.