Хитай даирилири уйғур елида 2025-йилғичә 5800 гә йеқин “кона мәһәллә” ни чеқип өзгәртидикән

Мухбиримиз әркин
2022-02-18
Share

Хитай даирилириниң уйғур елидики “кона мәһәллиләрни өзгәртиш” намида елип барған әнәнивий уйғур мәһәллилирини чеқип, биналаштуруш вә аһалиләрни тарқақлаштуруш һәркити давам қилмақта. Хитай даирилириниң ашкарлишичә, уйғур елида 2021-йилдин 2025-йилғичә 870 миң түтүнгә четишлиқ 5761 кона мәһәллә өзгәртилидикән. “шинҗаң гезити” ниң 18-феврал бәргән хәвиридә, бу йилниң өзидила шәһәр-базарлардики 1273 кона мәһәллә вә районниниң өзгәртилидиғанлиқи, буниңдин 203 миң 900 түтүнниң нәпкә еришидиғанлиқини билдүргән.

Бирақ кишилик һоқуқ тәшкилатлири вә чәт әл тәтқиқатчилириниң ейтишичә, хитайниң райондики аталмиш “кона мәһәллиләрни өзгәртиш қурулуши”, униң уйғур районидики “мәдәнийәт қирғинчилиқиниң бир парчиси” икән. Хитайниң мәқсити бу арқилиқ уйғур аһалилирини тарарқақлаштуруш, уларниң әнәнивий миллий турмуш шәкли вә җәмийәт қурулмисини парчилап, уларни техиму мудапийәсиз қоюш икән. Уйғур аптоном районлиқ олтурақ өй вә шәһәр-йеза қурулуши назаритиниң назири ли хоңбин “шинҗаң гезити” гә қилған сөзидә, кона мәһәллиләрни өзгәртиштә “тарихтин қелип қалған мәсилилири көп, зиддийәт вә қийинчилиқлири нурғун кона мәһәлиләр” ниң алдин бир тәрәп қилинидиғанлиқини ейтқан.

Мәлум болушичә, хитай һөкүмити 2017-йили башланған чоң тутқун билән бир вақитта “уйғур аптоном районлуқ кона мәһәллиләрни өзгәртиш хизмәт комитети” қурған, шундақла “кона мәһәллә-районларни омумиййүзлик өзгәртишниң йетәкчи пикири”, “кона мәһәллә-районларни өзгәртиш қурулуш лайиһәси” қатарлиқ һөҗҗәтләрни чүшүрүп, аһалиси чоң тутқунда ғайип болған нурғун уйғур мәһәллилирини “өзгәртиш” намида чеқип ташлиған. Хитай таратқулириниң билдүрүшичә, 2021-йили районда 1714 кона мәһәллә вә район өзгәртилгән болуп, бу 231 миң 500 түтүнгә четилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт