Конашәһәр наһийәсидә рамазанниң биринчи күни 40 миң чошқа беқиш тоғрисида келишим имзаланған

Мухбиримиз ирадә
2020-05-21
Елхәт
Пикир
Share
Принт

Хитай һөкүмитиниң 2020-йиллиқ рамазан ейиниң биринчи күни қәшқәрниң конашәһәр наһийәсидә 40 миң чошқа беқиш тоғрисида келишим имзалиғанлиқи ашкариланди.

Хитайниң «шинлаң техника хәвәрлири» торида 6-май күни елан қилинған бир хәвәрдин ашкарилинишичә, мәзкур чошқа беқиш түригә хитай телеграф ширкити 20 милйон йүән мәбләғ салған болуп, хәвәрдә «хитай телеграф ширкити қәшқәр конашәһәр наһийәсиниң намратлиқтин қутулуш түригә ярдәм берип, чошқа беқиш кәспи тәрәққиятиға һәссә қошти,» дәп мәдһийәләнгән.

Қәшқәр конашәһәр наһийәлик хәлқ һөкүмити вә хитай тйәнкаң чарвичилиқ техникиси тәрәққият чәклик ширкити һәр йили қәшқәрниң чошқа гөши еһтияҗини қамдаш үчүн 40 миң чошқа беқиштин ибарәт бу келишимни дәл мусулманларниң улуғ рамазан ейиниң биринчи күни, йәни 4-айниң 23-күни имзалиған.

Бу хәвәр чәтәлләрдики уйғур вәзийитини көзитип келиватқан көзәткүчиләрниң күчлүк диққитини қозғиди. Улар бу келишим имзаланған күнниң дәл рамазанниң биринчи күнигә тоғра кәлтүрүлүшиниң тасадипийлиқ әмәсликини әскәртти. Тәтқиқатчи адриян зенз әпәнди тивиттер торида бу хәвәрни тарқатқанда келишимниң рамазанниң биринчи күни имзалинишиға алаһидә диққәт ағдурған.

Хитай һөкүмити 2019-йили уйғур елидә чошқа гөши ишләпчиқиришини күчәйтиш үчүн 17 түрлүк сиясәт вә тәдбир чиқарған болуп, қәшқәр конашәһәр наһийәсидики санаәт районида мәхсус чошқа бақмичилиқи базиси қурулидикән. Хитай һөкүмити немә үчүн уйғур миллий мәдәнийитиниң бөшүки болған қәшқәрни чошқа гөши базиси қилип қурмақчи болғанлиқиға ениқ изаһат бәрмигән, бирақ чәтәлләрдики уйғур вәзийитигә қизиққучи тәтқиқатчилири буни уйғурларниң миллий өрп-адәтлиригә, дини етиқадиға қилинған ғәрәзлик һуҗум, дәп тәнқидлимәктә.

Пикирләр (0)
Share
Толуқ бәт