Konasheher nahiyeside ramazanning birinchi küni 40 ming choshqa béqish toghrisida kélishim imzalan'ghan

Muxbirimiz irade
2020-05-21
Élxet
Pikir
Share
Print

Xitay hökümitining 2020-yilliq ramazan éyining birinchi küni qeshqerning konasheher nahiyeside 40 ming choshqa béqish toghrisida kélishim imzalighanliqi ashkarilandi.

Xitayning "Shinlang téxnika xewerliri" torida 6-may küni élan qilin'ghan bir xewerdin ashkarilinishiche, mezkur choshqa béqish türige xitay télégraf shirkiti 20 milyon yüen meblegh salghan bolup, xewerde "Xitay télégraf shirkiti qeshqer konasheher nahiyesining namratliqtin qutulush türige yardem bérip, choshqa béqish kespi tereqqiyatigha hesse qoshti," dep medhiyelen'gen.

Qeshqer konasheher nahiyelik xelq hökümiti we xitay tyenkang charwichiliq téxnikisi tereqqiyat cheklik shirkiti her yili qeshqerning choshqa göshi éhtiyajini qamdash üchün 40 ming choshqa béqishtin ibaret bu kélishimni del musulmanlarning ulugh ramazan éyining birinchi küni, yeni 4-ayning 23-küni imzalighan.

Bu xewer chet'ellerdiki Uyghur weziyitini közitip kéliwatqan közetküchilerning küchlük diqqitini qozghidi. Ular bu kélishim imzalan'ghan künning del ramazanning birinchi künige toghra keltürülüshining tasadipiyliq emeslikini eskertti. Tetqiqatchi adriyan zénz ependi tiwittér torida bu xewerni tarqatqanda kélishimning ramazanning birinchi küni imzalinishigha alahide diqqet aghdurghan.

Xitay hökümiti 2019-yili Uyghur élide choshqa göshi ishlepchiqirishini kücheytish üchün 17 türlük siyaset we tedbir chiqarghan bolup, qeshqer konasheher nahiyesidiki sana'et rayonida mexsus choshqa baqmichiliqi bazisi qurulidiken. Xitay hökümiti néme üchün Uyghur milliy medeniyitining böshüki bolghan qeshqerni choshqa göshi bazisi qilip qurmaqchi bolghanliqigha éniq izahat bermigen, biraq chet'ellerdiki Uyghur weziyitige qiziqquchi tetqiqatchiliri buni Uyghurlarning milliy örp-adetlirige, dini étiqadigha qilin'ghan gherezlik hujum, dep tenqidlimekte.

Toluq bet