Корлидики уйғур - хитай тоқунуши хитай аһалисини сарасимигә салған

Мухбиримиз җүмә
2013-03-09
Share

Корлида уйғур - хитай тоқунуши йүз берип 4 адәм өлгәнлики хәвәр қилинғандин кейин, бу корлида турушлуқ хитай аһалисини сарасимигә салған, һөкүмәт уқтуруш чиқирип хитай пуқралирини кочиға чиқмаслиққа буйруған.

"ню - йорк вақит гезити" ниң хәвәр қилишичә, кочиға чиқмаслиқ буйруқи җүмә күни әмәлдин қалдурулған.

Әмма, даириләрниң корлидики бу тоқунуш вә тоқунуштин келип чиққан ақивәттин җиддий әнсиригәнлики пәрәз қилинмақта.

"ню - йорк вақит гезити" ниң нәқил қилишичә, корлидики бир меһманхана хоҗайини ли тавҗйе вәқәниң келип чиқиш сәвәби һәққидә охшимиған икки хил һекайә аңлиғанлиқини билдүргән.

Буниң биридә бир уйғур яш хитай ачқан қимарханида һәммә пулини уттурувәткәчкә хитай хоҗайиндин уттурувәткән пулиниң бир қисини қайтуруп беришни тәләп қилғанлиқи үчүн җедәл келип чиққан.

Вәқәниң йәнә бир хил вариянтида, бир уйғур яш қимарханида интайин көп пул утувалған болғачқа хитай хоҗайин пул беришни рәт қилған. Нәтиҗидә уйғур яшлар билән қимархана хоҗайини арисида җедәл келип чиққан.

Хәвәрдә нәқил қилишичә, ли вәқәдин кейинки һессиятини баян қилип: "биз уйғурлар икки хитайни пичақ тиқип өлтүрүпту, уйғурдин бири өлүпту, дәп аңлап бәк қорқуп кәттуқ. Шундақ биз хәнзулар қорққантуқ. Биз у чағда пәқәт уйғурларниң хитайларни өлтүргәнликинила аңлап бәк җиддийлишип кәттуқ. Биз бәк қорқуп кәттуқ. Һазир билсәк бу бир җинайи ишлар делоси икән. Ишлар һазир нормаллашти" дегән.

Хитай даирилири җүмә күни елан қилған хәвиридә вәқәдә 4 адәм өлгәнлики, 8 адәм яриланғанлиқини билдүрди. Әмма, өлгән вә яриланғанларниң кимлики вә буларниң өлүшидики тәпсилатларни ашкарилимиди.

Бәзи уйғурлар өлгәнләрниң һәммиси уйғур болуши мумкинлики, уларниң сақчилар тәрипидин етип өлтүрүлгән болушиму мумкинликни илгири сүрүшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт