Kosowo sérbiye bilen tarixiy kélishim hasil qildi

Kosowo jüme küni sérbiye bilen munasiwetlirini eslige keltürüsh mesilisi üstide tarixiy kélishim hasil qildi. Bu kélishim téxi nechche yilning aldidila bir birige düshmen bolghan bu ikki döletning munasiwetlirini yumshitip, yawropa birlikige eza bolush yoligha qedem tashlighanliqidin dérek béridiken.

Kélishimning netijilik bolushigha yawropa birliki ötken 6 aydin buyan köp tirishchanliq körsetken.

Mezkur 15 maddiliq kélishim boyiche, kosowo da'iriliri kosowoning shimaligha jaylashqan sérblargha aptonomiye hoquqi bérishke, sérbiye kosowoning yawropa elliri we rayondiki bashqa döletler bilen diplomatiye we soda alaqisi ornitishigha tosqunluq qilmasliqqa qoshulghan.

Kosowo bash ministiri hashim taji bu heqte toxtilip: bu kélishim bizning kona yarilarni saqaytishimizgha yardem qilidu. Kélishim yéngi bir dewrning, yeni yarishish we döletler ara hemkarliq dewrining bashlan'ghanliqidin dérek béridu, dédi.

Yawropa tashqi siyasetler bashliqi katérin ashton: biz ularning ötmüshtin bir qedem yiraqliship, yawropagha yéqinlishiwatqanliqigha shahit boluwatimiz, dédi.

Kosowo 2008- yili sérbiyidin bölünüp musteqil bolghan idi.

Gerche sérbiye kosowoning musteqilliqini hazirghiche étirap qilmighan bolsimu, kosowoning musteqilliqi 100 ge yéqin döletning étirap qilishigha érishken.

Bularning arisida amérika we sérbiye eza bolushqa tirishiwatqan yawropa birlikige eza 22 döletmu bar idi.