Хитайдики көзитиш камералириниң адәмләрни сәзгүр алаһидиликлири бойичә түргә айрийдиғанлиқи ашкариланди

Мухбиримиз ирадә
2021.03.31
Share on WhatsApp
Share on WhatsApp

Дунядики назарәт камера системилири үстидә тәтқиқат елип баридиған “IPVM” тәтқиқат ширкити хитайдики көзитиш камералириниң адәмләрни қеши, көзиниң чоң-кичикликигә охшаш миллий алаһидиликлири бойичә пәрқләндүрәләйдиғанлиқини байқиған.

Ройтерсниң хәвиридә ейтилишичә, хитай һөкүмити көзитиш камера ширкәтлиригә кәң көләмлик чирай пәрқләндүрүш системиси өлчимини турғузуш вәзиписи тапшурған болуп, хитайдики йүз тонуш камераси арқилиқ тартилған санлиқ мәлуматларниң қашниң чоң-кичиклики, терә рәңги вә миллитигичә болған он нәччә алаһидилик бойичә түргә айрилиши керәккән.

“IPVM” тәтқиқат ширкитиниң доклатиниң аптори чарлиз роллет мундақ дегән: “бу бизниң бундақ сәзгүр алаһидиликләр арқилиқ кишиләрни из қоғлап тәкшүрүватқан аммиви бихәтәрлик камера торини тунҗи қетим көрүшимиз”.

Доклаттики бир мисалда көрситилишичә, 2020-йили ноябирда бейҗиңдики кичик “әқиллиқ” туралғу түригә херидар чақириш оттуриға қоюлғанда, көзитиш камера ширкәтлири тәминләйдиған камераларниң кишиләрни терә рәңги, миллити вә чач пасони қатарлиқлар бойичә түргә айриш өлчимигә йетиши тәләп қилинған икән.

Роллет сөзидә “бу системини дәпсәндә қилиш қорали” дәп көрсәткән. Хәлқаралиқ кишилик һоқуқ тәшкилати болған “хусусий мәхпийәтлик тәшкилати” ниң ахбаратқа мәсул хадими кайтлин бишоп ройтерсқа қилған сөзидә чирай тонуш системисидики ирқий пәрқләндүрүш иқтидари пәйда қиливатқан әндишә күчийиватқанлиқини, болупму хитайниң бундақ техникиларни хәлқараға експорт қилишиниң кишини қаттиқ әндишигә салидиғанлиқини билдүргән.

“IPVM” тәтқиқат ширкити бу йил 1-айда, хитайдики Hikvision, Dahua вә Uniview қатарлиқ чоң техника ширкәтлириниң өз камералиридики уйғурларни байқаш, из қоғлаш вә назарәт қилиш иқтидариниң патент һоқуқини тизимға алдурғанлиқини ашкарилап зор ғулғула қозғиған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.