Xitaydiki közitish kaméralirining ademlerni sezgür alahidilikliri boyiche türge ayriydighanliqi ashkarilandi

Dunyadiki nazaret kaméra sistémiliri üstide tetqiqat élip baridighan “IPVM” tetqiqat shirkiti xitaydiki közitish kaméralirining ademlerni qéshi, közining chong-kichiklikige oxshash milliy alahidilikliri boyiche perqlendüreleydighanliqini bayqighan.

Roytérsning xewiride éytilishiche, xitay hökümiti közitish kaméra shirketlirige keng kölemlik chiray perqlendürüsh sistémisi ölchimini turghuzush wezipisi tapshurghan bolup, xitaydiki yüz tonush kamérasi arqiliq tartilghan sanliq melumatlarning qashning chong-kichikliki, tére renggi we millitigiche bolghan on nechche alahidilik boyiche türge ayrilishi kérekken.

“IPVM” tetqiqat shirkitining doklatining aptori charliz rollét mundaq dégen: “Bu bizning bundaq sezgür alahidilikler arqiliq kishilerni iz qoghlap tekshürüwatqan ammiwi bixeterlik kaméra torini tunji qétim körüshimiz”.

Doklattiki bir misalda körsitilishiche, 2020-yili noyabirda béyjingdiki kichik “Eqilliq” turalghu türige xéridar chaqirish otturigha qoyulghanda, közitish kaméra shirketliri teminleydighan kaméralarning kishilerni tére renggi, milliti we chach pasoni qatarliqlar boyiche türge ayrish ölchimige yétishi telep qilin'ghan iken.

Rollét sözide “Bu sistémini depsende qilish qorali” dep körsetken. Xelq'araliq kishilik hoquq teshkilati bolghan “Xususiy mexpiyetlik teshkilati” ning axbaratqa mes'ul xadimi kaytlin bishop roytérsqa qilghan sözide chiray tonush sistémisidiki irqiy perqlendürüsh iqtidari peyda qiliwatqan endishe küchiyiwatqanliqini, bolupmu xitayning bundaq téxnikilarni xelq'aragha éksport qilishining kishini qattiq endishige salidighanliqini bildürgen.

“IPVM” tetqiqat shirkiti bu yil 1-ayda, xitaydiki Hikvision, Dahua we Uniview qatarliq chong téxnika shirketlirining öz kaméraliridiki Uyghurlarni bayqash, iz qoghlash we nazaret qilish iqtidarining patént hoquqini tizimgha aldurghanliqini ashkarilap zor ghulghula qozghighan idi.