Xitay “Kungzi instituti” arqiliq qirghizistanda xitay tili we medeniyitini omumlashturmaqta

Washin'gtondin muxbirimiz irade teyyarlidi
2023.09.21

Xitay hökümitining qirghizistanda “Bir belbagh bir yol qurulushi” ning 10 yilliqini tebriklesh we ikki dölet otturisidiki türlük hemkarliqni kücheytish meqsitide “Kungzi instituti” ni kéngeytiwatqanliqi melum.

“Tengritagh tori” ning xitayche xewerliridin melum bolushiche, bishkek döletlik uniwérsitétida 2008-yili tunji kungzi instituti qurulghandin buyan hazirghiche kungzi dersxanisidin toqquzi we 10 oqutush orni échilghan. Shuningdek bu jaylarda 4000 din artuq oqughuchi xitay tili we medeniyiti boyiche terbiyelenmektiken.

Xewerde mundaq déyilgen: “2008-Yili qirghizistandiki bishkek döletlik uniwérsitétida tunji kungzi instituti qurulghandin buyan 500 din artuq yighin, léksiye, féstiwal, tiyatir, resim körgezmisi we musabiqe qatarliqlar arqiliq zamaniwi xitay medeniyiti teshwiq qilindi we omumlashturuldi”.

Xewerde yene, xitayning tereqqiyat muweppeqiyetlirini körgen qirghiz oqughuchilarda xitayche öginish qizghinliqi kötürülgenliki, xitayche öginidighanlarning intayin köplüki, dersxanida yerlik oqughuchilarning xitayning en'eniwi resim sizish we qeghez késish sen'itini ögen'genliki qatarliqlar bayan qilin'ghan.

Yéqinqi yillardin buyan amérika qatarliq gherb démokratik döletliride xitayning kungzi institutliri xitay kompartiyesining teshwiqat we tesir körsitish herikitining bir parchisi, dep qarilip taqilishqa yüzliniwatqanliqi melum. Döletlik tetqiqatchilar birleshmisi (National Association of Scholars) élan qilghan doklattin qarighanda, amérika tashqi ishlar ministirliqi 2019-yili kungzi institutlirini xitay hökümitining bashqurushidiki organ, dep békitkendin buyan, amérikida ilgiri bar bolghan 118 kungzi institutining yüzdin artuqi 2022-yili mayghiche taqilip bolghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.