Хитай даирилири "1-март күнмиң вәқәси" дә әйибләнгән 3 уйғурға берилгән өлүм җазасини иҗра қилди

Хитайниң һөкүмәт таратқулири 24-март күни 2014-йили хитайда йүз бәргән 31 адәмниң өлүшигә сәвәб болған "1-март күнмиң пойиз истансисидики пичақлиқ һуҗум вәқәси"ни пиланлиғучилар дәп әйибләнгән искәндәр әһәт, турғун тохтинияз вә һәсән муһәммәд қатарлиқ 3 уйғурға берилгән өлүм җазасиниң иҗра қилинғанлиқини хәвәр қилди.

Хәлқара мәтбуатларниң күнмиң пойиз истансиси вәқәсидә җавабкарлиқи бар дәп әйиблинип өлүмгә һөкүм қилинған бу үч нәпәр уйғур һәққидә бәргән хәвәрлири хитай һөкүмәт таратқулиридин пәрқлиқ болди. Әнглийә б б с агентлиқиниң хәвиридә "хитай һөкүмити вәқәдин икки күн илгири йәни 2-айниң 27-күни хитай чеграсидин қечишқа урунғанда тутқун қилинған, 1-март күнмиң пойиз истансисидики һуҗумда нәқ мәйданда болмиған бу үч уйғурни һуҗумни пиланлаш вә қәстән адәм өлтүрүш җинайити билән өлүмгә һөкүм қилди" дегән баянлар берилди.

Б б с агентлиқи, фирансийә агентлиқи, тәйвән мәркизи агентлиқи қатарлиқ хәлқара мәтбуатлар хәвәрлиридә йәнә, дуня уйғур қурултийи баянатчиси дилшат ришитниң бу һәқтә бәргән наразилиқ баянатидики "күнмиң пойиз истансисида йүз бәргән пичақлиқ һуҗумға четишлиқ дәп әйибләнгән бу уйғурлар адил сотлиништин мәһрум қалдурулди. Хитай һөкүмәт даирилири уйғурларни өлүмгә һөкүм қилиш арқилиқ, өз үстигә елишқа тегишлик сиясий мәсулийәттин қечишқа урунуватиду. Уйғурларниң бу хил қаршилиқ һәрикәтлиригә мәҗбурлинишиға бейҗиң һөкүмитиниң уйғурлар үстидин йүргүзүватқан қаттиқ бастуруш сиясити сәвәб болуватиду" дегән баянлирини нәқил алған.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар