Amérika diplomatiyesini asiyagha yüzlendürüshte muhim rol oynighan kurt kampbél amérikaning mu'awin tashqi ishlar ministirliqigha teyinlinishi mumkin
2023.09.08
Amérika dölet xewpsizlik kéngishi (National Security Council) hindi-tinch okyan ishlirining maslashturghuchisi kurt kampbél (Kurt Campbell) ning amérikaning mu'awin tashqi ishlar ministiriliqigha teyinlinishi mumkin iken.
“Aksiyos” (Axios) xewerler torining ehwaldin xewerdar kishilerdin igilishiche, kurt kampbél bu orun'gha muwapiq dep qariliwatqan eng asasliq kandidatlarning biri bolup, pirézidént jow baydénning uni békitish éhtimalliqi yuqiri iken.
Xitaygha taqabil turushni küchlük teshebbus qilish bilen tonulghan tejribilik diplomat kurt kampbél, sabiq pirézidént obama hökümiti mezgilidimu tashqi ishlar ministirliqida xizmet qilghan. U paytext washin'gtondiki elchixanilar we asiya döletliri tashqi ishlar ministirliqliri teripidin ismi nuqtiliq sanilidighan kishilerning biri iken. Téximu muhimi, kurt kampbél obama hökümitining diplomatiye siyasitini asiyagha yüzlendürüshte muhim rol oynighan iken.
“Aksiyos” ning déyishiche, eger kurt kampbél bu wezipige tallansa, u xitayning hindi-ténch okyan rayonidiki tesirini cheklesh؛ amérikaning xitay bilen soda we bashqa sahelerde dawamliq hemkarlishishidek murekkep munasiwitini idare qilishi kérek iken. U bu yil 6-ayda baydén hökümitining xitaygha tutqan pozitsiyesini xulasiligende, “Biz hazir xitay bilen riqabet ichide. Emma biz toqunush, qarshilishish yaki yéngi soghuq munasiwetler urushigha kirishni xalimaymiz. Biz peqet bu riqabetni mes'uliyetchanliq bilen idare qilishni közleymiz” dégen.
Kurt kampbélning amérikaning mu'awin tashqi ishlar ministirliqigha teyinlinish axirqi qarari békitilgendin kéyin, bu qarar kéngesh palatasining mu'eyyenleshtürüshige ewetilidiken.