Xitay lagérlirida yétip chiqqan "Uyghur ziyaliyliri" d u q gha qarshi erz qilidighanliqini bildürgen

Muxbirimiz erkin
2020-03-07
Élxet
Pikir
Share
Print

Xitayning lagérlirida yétip chiqqan bezi "Uyghur ziyaliyliri" dunya Uyghur qurultiyi üstidin özlirining resimlirini ruxsetsiz ishletken, dégen seweb bilen erz qilidighanliqini bildürgen. Lékin, xewerde qandaq erz qilidighanliqi, d u q ning bash shtabi turushluq gérmaniyege kélip erz qilidighanliqi yaki xitay sot orunlirigha erzi qilidighanliqi tilgha élinmighan. Dunya Uyghur qurultiyining ilgiri sürüshiche, bu, xitayning d u q gha qarshi qollan'ghan yéngi bir xil taktikisi iken.

Dunya Uyghur qurultiyi ötken hepte özining jenwediki b d t binasi aldida chédir qurup, körgezme achqan. Körgezmige xitayning 2017‏-yili bashlan'ghan chong tutqunda lagérgha élip kétilgen nurghun Uyghur ziyaliylirining resimi qoyulghan. Ularning ichide qeshqer uniwérsitétining sabiq proféssori gülnar obul, shinjang yazghuchilar jem'iyitining sabiq re'isi azat sultan, shinjang ijtima'iy penler akadimiyesining xadimi gheyret abduraxman qatarliq ziyaliylarning resimi bar idi. Lékin, xitayning "Yershari waqti" gézitining ilgiri sürüshiche, gülnar obul, azat sultan, gheyret abduraxman qatarliqlar mezkur gézitke söz qilip, özlirining lagérda yatqanliqini inkar qilghan, shundaqla d u q ni özlirining resimini ruxsetsiz körgezmige qoyush bilen eyibligen. Ular birdek "Nami pur ketken bu teshkilatqa qarshi qanuniy erz qilish hoquqini saqlap qalidighanliqi" ni bildürgen. Dunya Uyghur qurultiyining bayanatchisi dilshat rishit 6‏-mart radiyomizda bu xewerge inkas bildürüp, yuqiriqi ziyaliylarning bu sözlerni xitayning bésimida qiliwatqanliqini bildürdi. Uning tekitlishiche, "Xitayning meqsidi bu arqiliq dunya Uyghur qurultiyini étibarsizlashturush" iken. Radiyomiz ilgiri gülnar obul, azat sultan, gheyret abduraxmanning tutqun qilinip, lagérgha élip kétilgenlikini delligenidi.

Toluq bet