Қазақ лагер шаһити ербақит отарбай әнглийә сода министири үстидин сотқа әрз қилишқа тәйярлиқ қилмақта

Әнглийәдә турушлуқ қазақ лагер шаһити ербақит отарбай, әнглийәниң “шинҗаң пахта” мәһсулатлирини импорт қилишни давамлаштурушиға қарита әнглийә сода министири үстидин сотқа әрз қилишқа тәйярлиқ қилмақтикән. Әнглийә “асман хәвәрлири” қанилиниң билдүрүшичә, әнглийә һөкүмити уйғур мәҗбурий әмгики мәһсулатлирини чәкләштә сөрәлмилик қилиш билән әйибләнгән. Ербақит отарбайниң адвокати паул конрат, әнглийә һөкүмитиниң “мувапиқ болмиған қанунларниң арқисиға йошурунувелиши кишини “ғәзәпләндүриду” дегән. Шундақла йәнә әнглийә консерватиплар партийәсиниң сабиқ рәһбири сир донкан симит, әнглийәниң бу җәһәттә “башқа дөләтләрниң арқида қалғанлиқи” ни ейтқан.

Ербақит отарбай 2017-йили хитай даирилири тәрипидин тутқун қилинип, бир хитай кийим-кечәк завутида мәҗбурий ишлитилгән. У қоюп берилгәндин кейин қазақистанға чиқип, өткән йили әнглийәдә ечилған лондон уйғур сот коллегийәсидә гуваһлиқ бәргәниди. “асман хәвәрлири” ниң қәйт қилишичә, ербақит отарбай илгири әнглийә сода министири кеми бадинокқа хәт йезип, әнглийәниң райондин импорт қилинған пахта мәһсулатлириға һечқандақ чәклимә қоймаслиқтәк кәмчиликини түзитишни тәләп қилған. У мундақ дәп язған: “мән әркин дөләттә болғанлиқим үчүн тәләйлик. Бирақ мән арқамда қалған кишиләрни тәсәввур қилалмаймән. Уларға немә болғанлиқи, қандақ дәһшәтләргә учриғанлиқини билмәймән.”

Ербақит отарбай 2017-йили ислам диниға аит қанунсиз видео көрүш, телефониға ватсап юмталини қачилаш билән әйиблинип тутқун қилинған. Униң ейтишичә, у тутқунда униңға нурғун қетим “койза-кишән селинип, һошидин кәткичә қийин-қистаққа елинған” болуп, у “тезрәк өлүп кетишни арзу қилған”.

Әнглийә парламенти хитайниң уйғурларға ирқий қирғинчилиқ қиливатқанлиқини ‍етирап қилған болсиму, бирақ уйғур мәҗбурий әмгиик мәһсулатлириниң импорт қилинишини һазирғичә чәклимигәниди.