Qazaq lagér shahiti érbaqit otarbay en'gliye soda ministiri üstidin sotqa erz qilishqa teyyarliq qilmaqta

En'gliyede turushluq qazaq lagér shahiti érbaqit otarbay, en'gliyening “Shinjang paxta” mehsulatlirini import qilishni dawamlashturushigha qarita en'gliye soda ministiri üstidin sotqa erz qilishqa teyyarliq qilmaqtiken. En'gliye “Asman xewerliri” qanilining bildürüshiche, en'gliye hökümiti Uyghur mejburiy emgiki mehsulatlirini chekleshte sörelmilik qilish bilen eyiblen'gen. Érbaqit otarbayning adwokati pa'ul konrat, en'gliye hökümitining “Muwapiq bolmighan qanunlarning arqisigha yoshurunuwélishi kishini “Ghezeplendüridu” dégen. Shundaqla yene en'gliye konsérwatiplar partiyesining sabiq rehbiri sir donkan simit, en'gliyening bu jehette “Bashqa döletlerning arqida qalghanliqi” ni éytqan.

Érbaqit otarbay 2017-yili xitay da'iriliri teripidin tutqun qilinip, bir xitay kiyim-kéchek zawutida mejburiy ishlitilgen. U qoyup bérilgendin kéyin qazaqistan'gha chiqip, ötken yili en'gliyede échilghan london Uyghur sot kollégiyeside guwahliq bergenidi. “Asman xewerliri” ning qeyt qilishiche, érbaqit otarbay ilgiri en'gliye soda ministiri kémi badinokqa xet yézip, en'gliyening rayondin import qilin'ghan paxta mehsulatlirigha héchqandaq cheklime qoymasliqtek kemchilikini tüzitishni telep qilghan. U mundaq dep yazghan: “Men erkin dölette bolghanliqim üchün teleylik. Biraq men arqamda qalghan kishilerni tesewwur qilalmaymen. Ulargha néme bolghanliqi, qandaq dehshetlerge uchrighanliqini bilmeymen.”

Érbaqit otarbay 2017-yili islam dinigha a'it qanunsiz widé'o körüsh, téléfonigha wats'ap yumtalini qachilash bilen eyiblinip tutqun qilin'ghan. Uning éytishiche, u tutqunda uninggha nurghun qétim “Koyza-kishen sélinip, hoshidin ketkiche qiyin-qistaqqa élin'ghan” bolup, u “Tézrek ölüp kétishni arzu qilghan”.

En'gliye parlaménti xitayning Uyghurlargha irqiy qirghinchiliq qiliwatqanliqini ‍étirap qilghan bolsimu, biraq Uyghur mejburiy emgi'ik mehsulatlirining import qilinishini hazirghiche cheklimigenidi.