Bir sabiq xitay lagér tutquni jaza lagérlirida Uyghurlar uchrawatqan zulumlarni ashkarilidi

Muxbirimiz erkin
2022-02-18
Share

2019-Yili qisqa muddet Uyghur élidiki jaza lagérida yétip, lagérdin chiqqandin kéyin amérikagha qéchip kelgen bir sabiq xitay lagér tutquni, amérika taratqulirigha jaza lagérlirida Uyghurlar uchrawatqan zulumlarni ashkarilighan. U tashqiy dunyagha chiqip, jaza lagérlirida yüz bériwatqan wehshiliklerni ashkarilighan sanaqliq xitay “Shahit” lirining biridur. Buning aldida Uyghur élida bir mezgil wezipe ötigen bir sabiq xitay saqchisimu, londonda échilghan “Uyghur sot kollégiyesi” de Uyghurlar uchrawatqan wehshiliklerni ashkarilap, guwahliq bergen idi.

Amérikadiki “Körüsh waqti” torining xewer qilishiche, jyang yüen isimlik bu lagér tutquni amérikadiki falun'gochilarning “Büyük éra” géziti we “Yéngi tangliqlar” téléwiziye qanilida, özining 2019-yili Uyghur élida tutqun qilinip, 35 kün atalmish “Qayta terbiyelesh” lagérida yétish jeryanida körgen we béshidin kechürgenlirini ashkarilighan. 12 Yéshida a'ilisi bilen Uyghur éligha köchüp kelgen jyang yüenning éytishiche, “Lagérdikiler haywandek mu'amilige uchraydiken we mejburiy emgekke sélinidiken.”

Közetküchiler, uning guwahliqi Uyghur, qazaq lagér shahitliri ashkarilighan ehwallar bilen eynen ikenlikini, buning lagérlarda sadir boluwatqan qorqunuchluq jinayetlerge da'ir delillerni téximu kücheytidighanliqini bildürgen.

Jiyang yüenning éytishiche, Uyghur élida hazirmu lagérlar quruluwatqan bolup, lagér qurulushi xitay sodigerlirige höddige bérilidiken, emma qurulushta Uyghur ishchilar ishlep, ish heqqini saqchilar alidiken. U lagérda ayallargha mejburiy hormonliq dora ichürülüp, héyizining toxtitilidighanliqi, hemmisining chéchi chüshürülüp, uningdin yalghan chach yasap xelq'aragha ékisport qilinidighanliqi, tutqunlarning köpinchisi lagér ichidiki zawutta ishleydighanliqi we her küni tutqunlarning partiyege sadiq bolush toghrisida méngisi yuyulidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet