Xitay tibet merkizi lasadiki potala ibadetxanisining üstige dölet bayriqini asti

Tibetlerning paytexti, tibet buddizmining muqeddes yéri dep qaralghan lasadiki potala sariyining üstige xitay dölet bayriqi ésilghan.

Amérika awazining xewer qilishiche, potala sariyi hem ibadetxana bolup, u esli tibetning siyasiy we diniy rehberlik merkizi orni idi. Bu jayda ezeldin tibet rohaniy we siyasiy dahiysi dalay lama turatti. Hazirqi dalay lamamu 1959-yili hindistan'gha qéchishtin ilgiri bu yerde turghan idi.

Xewerde éytilishiche, xitay dölet bayriqi yene lasa sheher merkizidiki eng chong chokang ibadetxanisining munarighimu ésilghan.

Nöwette, tibette budda ibadetxanilirigha xitay dölet bayriqi ésish, dölet rehberlirining süretlirini ésish heriketliri bashlan'ghan bolup, bu heriket “Wetenperwerlik” dep chüshendürülgen. Bir budda rahibining bildürüshiche, 2011-yili, tibette ibadetxana bashqurush komitéti qurulup, “9 Zörüriyet” dep atalghan bir pa'aliyet yolgha qoyulghan. Mezkur “9 Zörüriyet” ning qatarida ibadetxanilarda “Bayraq we rehberlerning süretliri bolushi zörür” dégen mezmunmu bar iken. Shu boyiche hemme yerdiki tibet ibadetxanilirida bayraq we süret ésish yolgha qoyulghan.

Uyghur élidiki bir qisim jaylarda musulmanlarning meschitlirige xitay dölet bayriqi ésish mejburiy yolgha qoyulghan bolup, hetta bezi jaylarda bu qattiq qarshiliqlargha uchrighan idi.