Amérika xitayning lyentong (Unicom) shirkitini jasusliq endishisi tüpeyli chekligen

Amérika xitayning eng chong téléfon alaqe shirketlirining biri bolghan lyentong (Unicom) shirkitini jasusliq qilish endishisi tüpeyli chekligen. Buning bilen lyentong shirkiti amérikaning dölet bixeterliki we jasusliq qilish endishisi bilen cheklen'gen yene bir xitay téléfon shirkiti bolup qaldi.

Amérika fédiratsiye xewerlishish komissiyesining bildürüshiche, ular birdek awaz bérip, lyentong shirkitining amérikadiki meshghulat ruxsitini bikar qilishni qarar qilghan.

Buningdin awwal, yeni ötken yili 10-ayda amérika fédiratsiye xewerlishish komissiyesi xitayning eng chong téléfon shirkiti bolghan “Xitay mobil” shirkitining amérikadiki meshghulatini chekligen idi. Melum bolushiche, “Lyentong” shirkiti 60 kün ichide amérikadiki téléfon mulazimet meshghulatini toxtitishi kérek iken.

Amérika fédiratsiye xewerlishish komissiyesining ayal re'isi jéssika rozénworsél bu heqtiki bayanatida: “Xitayning dölet igilikidiki alaqilishish wastilirining xewerlishish torimizning bixeterlikige ré'al tehdit séliwatqanliqigha a'it nahayiti köp deliller we künséri küchiyitwatqan endishiler bar,” dégen.

Amérika yéqinqi yillardin béri dölet xewpsizliki we Uyghur irqiy qirghinchiliq mesilisi tüpeyli xitay téxnologiye we xewerlishish shirketlirige qarita teqibni küchüytken. Prézidént baydén ötken yili qanun'gha imza qoyup, “Bixeterlikke tehdit” dep qaralghan shirketlerge amérikada mulazimet ruxsiti bérishni men'iy qilghan. Buning bilen xu'awéy, jongshing we bashqa xitay xewerlishish shirketlirige te'elluq bolghan alaqe eswaplirining amérika téléfon alaqe torini ishlitishi cheklen'gen idi.