Хитайниң рабийә қадирдин савақ елип лю шавбони қоюп бәрмәйватқанлиқи илгири сүрүлмәктә

Мухбиримиз шөһрәт һошур
2017.07.12

Хәлқара хәвәрләрдин мәлум болушичә, нобел саһиби лю шавбониң кесили күнсери еғирлашмақта.

Хәлқара җамаәт пикриниң бесими билән хитай тәрәп америка вә германийәлик мутәхәссисләрниң лю шавбониң саламәтлик әһвалини тәкшүрүшигә йол қойған болсиму, униң кесилиниң бәкла еғирлиқи вә чәтәлгә йөткигүчилики йоқлуқини илгири сүрмәктә. Мутәхәссисләр болса лю шавбониң әһвалиниң еғирлиқини, әмма йәнә давамлиқ давалап көрүшниң зөрүрлүкини баян қилған.

Гуардиян гезитиниң бүгүнки бу һәқтики хәвиридә дейилишичә, хәлқара кәчүрүм тәшкилати қатарлиқ тәшкилатлар хитайни лю шавбониң чәтәлдә давалинишиға йол қоюшқа давамлиқ түрдә чақириқ қилмақта.

Хәвәрләрдә, лю шавбониң чәтәлдә давалинишиға йол қоюлмаслиқта хитайниң сиясий әндишилириниң муһим рол ойнаватқанлиқи вә буниңға хитайниң рабийә қадир ханим тәҗрибисиниң сәвәб болғанлиқи илгири сүрүлмәктә.

Хитайниң йәр шари вақти гезити, 6-айниң 28-күнидики мақалисидә уйғур миллий һәрикити рәһбири рабийә қадир ханимниң намини ашкара тилға елип мундақ дегән: “җуңгода мәһбусларни чәтәлгә давалинишқа қоюп беридиған иш бурунму болған, мәсилән, рабийә қадир, әмма у чәтәлгә чиққанда бурун бәргән сиясий паалийәтләргә арилашмаслиқ, җуңгониң дөләт бихәтәрликигә тәсир йәткүзмәслик һәққидики вәдисини бузған.”

Хитай даирилириниң зувани һесабланған йәршари вақти гезитидики мәзкур мақалидә йәнә “әгәр лю шавбому рабийә қадир қилғанни қилса, ғәрбтә техиму көп базар тапиду” дейилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.