Ма шиңруй хотәндә тәкшүрүштә болғанда муқимлиқниң “һәммидин үстүн” туридиғанлиқини йәнә тәкитлигән

Вашингтондин мухбиримиз әркин тәйярлиди
2024.04.01

Хитайниң уйғур дияридики алий рәһбири ма шиңруй 30-март күни хотәндә тәкшүрүштә болғанда, муқимлиқниң уйғур диярида йәнила “һәммидин үстүн туридиған амил” икәнликини тәкитлигән.

Ма шиңруй 2021-йили 12-айда уйғур аптоном районлуқ парткомниң секретарлиқиға йөткәп келингән бери, уйғур диярида алий сүпәтлик ишләпчиқиришни алдинқи орунға қоюшни тәкитләп кәлгән болсиму, лекин униң 30-март күни хотәндә муқимлиқниң “һәммидин үстүн” икәнликини қәйт қилиши диққәт қозғимақта. Хитай таратқулириниң ашкарлишичә, ма шиңруй хотәндә тәкшүрүштә болғанда, “баш секретар ши җинпиңниң йолйоруқини һәр вақит әстә тутушни һәмдә иҗтимаий муқимлиқни сақлашни һәр вақит алдинқи орунға қоюшта чиң туруш” ни тәләп қилған. Хитай тартқулириниң хәвәрлиридә, ма шиңруйниң хотәндә җ х тармақлирини, карханиларни, болупму компартийәниң йеза-кәнтләрдики асас қатлам контроллуқ хизмитини тәкшүргәнлики қәйт қилинмақта.

“тәңритағ тори” ниң билдүрүшичә, ма шиңруй “шинҗаңда асаси қатлам хизмитиниң интайин муһимлиқи, болупму җәнубий шинҗаңда техиму муһим” икәнликини ейтқан. Һалбуки, кишилик һоқуқ тәшкилатлири вә чәт әл тәтқиқат орунлириниң доклатлирида, хитайниң 2017-йили башланған чоң тутқунида хотән хитайниң әң қаттиқ бастурушиға учрапла қалмай, бәлки йәнә әмгәк күчлирини йөткәш вә “нопусни әлалаштуруш” сияситиниңму әң еғир зиянкәшликигә учриған вилайәтләрниң бири икәнлики қәйт қилинмақта.

“тәңритағ тори” ниң билдүрүшичә, ма шиңруй хотән җ х тармақлириға қилған сөзидә хотәндики наһийә вә йезиларниң асасий қатлам қанун иҗра қилиш күчлирини үнүмлүк көләмләштүрүп, уларниң “бир тәрәп қилиш” иқтидарини үзлүксиз өстүрүшни, йеза-кәнтләрниң биринчи қол секретари вә йеза-кәнтләрдә турушлуқ хизмәт әтрәтлириниң ролини техиму үнүмлүк җари қилдурушни тәләп қилған.

Ма шиңруй йәнә ши җинпиңниң 2023-йили җәнубий африқадин қайтиш сәпиридә үрүмчидә тохтап, уйғур аптоном райони вә биңтүәнниң хизмәт доклатини аңлиғанда, “иҗтимаий муқимлиқни сақлашни изчил биринчи орунға қоюш” ни тәләп қилғанлиқини билдүргән. Мәлум болушичә, ма шиңруй өткән һәптә ғулҗада үч күнлүк тәкшүрүш елип беришниң арқисидинла 30-март хотәндә тәкшүрүштә болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.