Ма шиңрүй “шинҗаңниң дөләт енергийә бихәтәрликигә капаләтлик қилиши” ни тәләп қилди

Хитайниң уйғур дияридики алий әмәлдари ма шиңрүй 12-май күни тәклимаканниң ғәрбий-җәнубиға җайлашқан гума, қағилиқ қатарлиқ җайлардики нефит вә тәбиий газ қезиш, ишләпчиқириш вә запас сақлаш әслиһәлиригә қарита тәкшүрүштә болғанда, уйғур дияриниң “хитай енергийә бихәтәрликигә капаләтлик қилиши” ни йәнә тәләп қилған.

Ма шиңрүйниң бу җәрянида 2024-йили 23-апрел күни бейҗиңда чақирилған “ғәрбни ечиш сөһбәт йиғини” да ши җинпиңниң қилған сөзиниң роһини қәтий изчиллаштурушни тәкитлигәнлики қәйт қилинмақта.

“шинҗаң гезити” қатарлиқ һөкүмәт таратқулириниң хәвәрлиридә билдүрүшичә, ма шиңрүй бу қетим ши җинпиң оттуриға қойған “‛төт инқилаб, бир һәмкарлиқ‚ йеңи енергийә истратегийәсини чоңқур иҗра қилип, йеңи дәврдики ғәрбни ечишни алға сүрүш сөһбәт йиғининиң роһини қәтий әмәлийләштүрүш, шуниңдәк нефит вә тәбиий газ санаитиниң шинҗаңдики дөләт енергийә бихәтәрликигә капаләтлик қилиштики ролини техиму чоңқур чүшиниш” ни тәләп қилған.

Мәлум болушичә, хитайниң 23-апрел өткүзүлгән “ғәрбни ечиш сөһбәт йиғини” да хитайниң ғәрбидики өлкә вә аптоном районларға, җүмлидин уйғур дияриға мәбләғ селиш салмиқини ашуруш, шу арқилиқ ишләпчиқириш вә енергийә түрлирини кеңәйтиш оттуриға қоюлған. Йиғинда ши җинпиң “миллий районлар җуңхуа миллити ортақ еңи бәрпа қилишни тәрәққиятниң пүткүл җәряниға вә һәр қайси тәрәпләргә тәтбиқлиши керәк” дегәниди.

Хитай һөкүмити уйғурларға ирқий қирғинчилиқ қилиш билән әйиблинип, униң қилмишини җавабкарлиққа тартиш чуқанлири давамлишиватқан бир пәйттә, хитайниң ишләпчиқириш салмиқи вә енергийә түрлирини кеңәйтишни оттуриға қоюши диққәт қозғимақта.

“шинҗаң гезити” ниң билдүрүшичә, ма шиңрүй йәнә қәшқәр билән хотәнниң хотәндә санаәт тәрәққиятини тезлитип, “һәр милләт хәлқиниң ишқа орунлишиш вә киримини ашуруш” ни тәкитлигән. Һалбуки, худсон ақиллар мәркизи 2023-йили ноябирда елан қилған хитай иқтисади һәққидики доклатта хитайниң әң чоң иқтисади аҗизлиқлириниң бири униң енергийәгә болған еһтияҗиниң қандурулмаслиқи, дәп көрситилгән иди.