Ma shingrüy “Shinjangning dölet énérgiye bixeterlikige kapaletlik qilishi” ni telep qildi

Washin'gtondin muxbirimiz erkin teyyarlidi
2024.05.13

Xitayning Uyghur diyaridiki aliy emeldari ma shingrüy 12-may küni teklimakanning gherbiy-jenubigha jaylashqan guma, qaghiliq qatarliq jaylardiki néfit we tebi'iy gaz qézish, ishlepchiqirish we zapas saqlash eslihelirige qarita tekshürüshte bolghanda, Uyghur diyarining “Xitay énérgiye bixeterlikige kapaletlik qilishi” ni yene telep qilghan.

Ma shingrüyning bu jeryanida 2024-yili 23-aprél küni béyjingda chaqirilghan “Gherbni échish söhbet yighini” da shi jinpingning qilghan sözining rohini qet'iy izchillashturushni tekitligenliki qeyt qilinmaqta.

“Shinjang géziti” qatarliq hökümet taratqulirining xewerliride bildürüshiche, ma shingrüy bu qétim shi jinping otturigha qoyghan “‛töt inqilab, bir hemkarliq‚ yéngi énérgiye istratégiyesini chongqur ijra qilip, yéngi dewrdiki gherbni échishni algha sürüsh söhbet yighinining rohini qet'iy emeliyleshtürüsh, shuningdek néfit we tebi'iy gaz sana'itining shinjangdiki dölet énérgiye bixeterlikige kapaletlik qilishtiki rolini téximu chongqur chüshinish” ni telep qilghan.

Melum bolushiche, xitayning 23-aprél ötküzülgen “Gherbni échish söhbet yighini” da xitayning gherbidiki ölke we aptonom rayonlargha, jümlidin Uyghur diyarigha meblegh sélish salmiqini ashurush, shu arqiliq ishlepchiqirish we énérgiye türlirini kéngeytish otturigha qoyulghan. Yighinda shi jinping “Milliy rayonlar jungxu'a milliti ortaq éngi berpa qilishni tereqqiyatning pütkül jeryanigha we her qaysi tereplerge tetbiqlishi kérek” dégenidi.

Xitay hökümiti Uyghurlargha irqiy qirghinchiliq qilish bilen eyiblinip, uning qilmishini jawabkarliqqa tartish chuqanliri dawamlishiwatqan bir peytte, xitayning ishlepchiqirish salmiqi we énérgiye türlirini kéngeytishni otturigha qoyushi diqqet qozghimaqta.

“Shinjang géziti” ning bildürüshiche, ma shingrüy yene qeshqer bilen xotenning xotende sana'et tereqqiyatini tézlitip, “Her millet xelqining ishqa orunlishish we kirimini ashurush” ni tekitligen. Halbuki, xudson aqillar merkizi 2023-yili noyabirda élan qilghan xitay iqtisadi heqqidiki doklatta xitayning eng chong iqtisadi ajizliqlirining biri uning énérgiyege bolghan éhtiyajining qandurulmasliqi, dep körsitilgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.