Ма шиңруй ғулҗа шәһиридә сақчиханиларниң күчини ашурушни, кона мәһәллиләрни давамлиқ өзгәртишни тәкитлигән

Хитай мәтбуатлиридин “шинҗаң гезити” ниң 26-феврал чиқарған хәвиригә қариғанда, уйғур аптоном районлуқ парткомниң секретари ма шиңруй или областиға берип, “хизмәтләрни көздин кәчүрүш вә тәкшүрүп тәтқиқ қилиш” давамида, ғулҗа шәһиридики йәрлик сақчиханиларниң хизмәт иқтидарини өстүрүшни алаһидә тәкитлигән.

Ма шиңруй 2-айниң 25-күни ғулҗа шәһиридики хизмәт тәкшүрүшидә, нуқтилиқ һалда “шәрқий шинхуа йоли сақчиханиси” ни көздин кәчүрүп, сақчиханиниң хизмәт әһвални игилигәндин кейин, сақчиханиниң вәзипә иҗра қилиш иқтидарини өстүрүшни биринчи орунға қоюшни, сақчиларниң қорал, техника вә маһарәт җәһәттики күчини ашурушни, “йошурун хәтәрни байқаш вә тоғра пәрқ етиш” иқтидарини өстүрүшни тәләп қилған.

Ма шиңруй йәнә ғулҗа шәһиридики кона мәһәллиләрни чеқип өзгәртиш қурулуши һәққидики доклатни аңлиғандин кейин, бу шәһәрдә йеңидин қурулидиған мәһәллиләрни “хитайчә услуб билән миллий алаһидилик бирләшкән, җуңхуа милләтлири ортақ гәвдиси еңини мустәһкәмләшкә пайдилиқ болған” шәкилдә қуруп чиқишни буйруған.

Ма шиңруйниң или областиға қилған бу қетимлиқ хизмәт тәкшүрүши муһаҗирәттики уйғурлар “5-феврал ғулҗа қирғинчилиқи” ниң 28 йиллиқини кәң көләмдә хатирилигәндин кейинки вақитқа тоғра кәлгән болуп, хитай һөкүмитиниң бу җайниң муқимлиқини сақлашқа алаһидә күч сәрп қиливатқанлиқи билинмәктә. Бу хәвәрдин йәнә, хитай һөкүмитиниң ғулҗа шәһиридики әнәниви уйғур мәһәллилирини чеқип түзләп, хитайчә услубтики биналарни тикләп, иқтисадий күчни арқа тирәк қилған хитай мәдәнийити һөкүмранлиқини бәрпа қиливатқанлиқи көрүлмәктә. Хитай һөкүмити бу хил қурулушни җәнубтики қәшқәр қатарлиқ вилайәтләрдиму күчәп елип барған болуп, бу һәқтә пикир баян қилған мутәхәссисләр, буниң сиясәт нами астида йүргүзүлгән мәдәнийәт қирғинчилиқи икәнликини билдүргәниди.