Ма шиңрүй ғәрбниң уйғур елиға йүргүзгән ембаргосиниң район тәрәққиятидики “әң чоң хирис” қа айланғанлиқини билдүргән

Уйғур аптоном районлуқ парткомниң секретари ма шиңрүй бейҗиңда өткүзүлүватқан хитай мәмликәтлик хәлқ қурултийиниң “шинҗаң вәкилләр өмики” гуруппа музакирә йиғинида сөз қилип, ғәрбниң уйғур елиға йүргүзгән ембаргоси районниң тәрәққиятидики “әң чоң хирис” қа айланғанлиқини билдүргән.

Бу, ма шиңрүйниң тунҗи қетим америка қатарлиқ ғәрб әллириниң уйғур елидики бастурушлири вә кишилик һоқуқ дәпсәндичиликигә қарши йүргүзгән җазаси, районниң тәрәққиятидики “әң чоң хирис” қа айланғанлиқини хитайниң мәмликәтлик йиғинида очуқ ашкарә тилға елишидур. Ма шиңрүй бу сөзләрни хитай таратқулири уйғур елиниң ташқий содиси һәссиләп көпийип, мәбләғ вә саяһәтчилик гүллиниватқанлиқи, иқтисадниң җуш уруп раваҗлиниватқанлиқини қаттиқ давраң қиливатқан бир пәйттә оттуриға қойған.

Америка, канада, явропа иттипақи вә әнгилийә 2021-йили 3-айда “шинҗаң ишләпчиқириш-қурулуши биңтүәни” билән 4 нәпәр хитай әмәлдариға уйғурларни бастурушта ойниған роли сәвәблик ембарго қойған. Арқидинла америка “уйғур мәҗбурий әмгикиниң алдини елиш қануни” мақуллап, уйғур елидә ишләпчиқирилған мәһсулатларниң америка базириға киришини чәклигән.

Буниң билән нурғун хәлқаралиқ ширкәтләр уйғур ели билән болған сода алақисини кәскән. Германийәниң волкисваген ширкити техи йеқиндила үрүмчидики завутини тақиғанлиқини елан қилған иди. Ма шиңрүй хитай мәмликәтлик 14-нөвәтлик хәлқ қурултийи 3-қетимлиқ йиғиниға қатнишиватқан “шинҗаң вәкилләр өмики” ниң гуруппа музакирә йиғинида, бәзи ғәрб дөләтлириниң шинҗаң уйғур аптоном райони содисиға қаратқан “мәҗбурий әмгәк” дегәндәк асассиз әйибләшлириниң, районниң тәрәққияти үчүн “әң чоң хирис” болуватқанлиқини билдүргән. Йиғинда ма шиңрүй, хитай һөкүмитиниң уйғур кишилик һоқуқ вәзийитини тәнқид қилғучиларни “шинҗаңға боһтан чаплаш” билән әйибләп кәлгинидәк, бәзи ғәрб дөләтлириниң кишилик һоқуқни қоғдаш намида “шинҗаң һәққидә ялған сөзләватқанлиқи” вә униңға боһтан чаплаватқанлиқини тәкитлигән. Униң қәйт қилишичә, американиң шинҗаңға қаратқан ембаргоси 144 тин артуқ ширкәткә тәсир көрсәткән.