Ма шиңруй “террорлуққа қарши туруп муқимлиқни сақлашни даимлаштуруш, кадирларни асасий қатламға әвәтиш” ни тәкитлигән

Вашингтондин мухбиримиз ирадә тәйярлиди
2024.04.25

Уйғур аптоном районлуқ парткомниң секретари ма шиңруй 24-апрел күни ечилған уйғур аптоном районлуқ партком даимий һәйәтлириниң мәхсус йиғинида, “шинҗаңда диққәтни террорлуққа қарши турушқа вә муқимлиқни сақлашни даимлаштурушқа мәркәзләштүрүш керәк” дегән. У йәнә асасий қатламға, болупму уйғур райониниң җәнубидики асасий қатлам йеза-кәнтләргә зор санда кадир чүшүрүшни алаһидә тәкитлигән.

“тәңритағ тори” ниң бу һәқтики хәвиригә қариғанда, ма шиңруй бу сөзләрни уйғур аптоном районлуқ партком даимий комитетиниң “ши җинпиңниң шинҗаңни идарә қилиш йолйоруқини өгиниш” вә “шинҗаңни омумйүзлүк қанун бойичә идарә қилишни күчәйтиш” темисидики мәхсус йиғинида оттуриға қойған. У, “шинҗаңни омумйүзлүк қанун бойичә идарә қилиш узақ муддәтлик вәзипә, мәсулийәт еғир, йол йирақ. Бу биригә тәгсә һәммисигә тәсир көрситидиған муһим саһә, шуңа бу җәһәттә ачқучлуқ һалқиларни чиң тутуп сиҗил күчишимиз керәк” дегән.

У шу күндики сөзидә асасий қатламға кадир әвәтиш мәсилисини тилға елип, “қанун вә тәптиш саһәсидики мунәввәр кадирлар билән ихтисаслиқларни асасий қатламға, болупму җәнубий шинҗаңдики асасий қатламға әвәтип, уларниң амма арисиға чөкүшигә түрткә болуш; асасий қатламни идарә қилиш иқтидарини үзлүксиз өстүрүш керәк” дегән.

Ма шиңруйниң бу сөзлири алдинқи күни уйғур аптоном районлуқ партком уйғур районида “җуңхуа миллити ортақ гәвдиси еңи” ни күчәйтиш бойичә қарар мақуллиғандин кейин оттуриға қоюлған. Униң асасий қатламға, болупму уйғурлар нопуси һелиһәм мутләқ үстүнлүкни игиләйдиған җәнубтики вилайәт вә областларниң йеза-кәнтлиригә зор түркүмдә кадир чүшүрүшни тәкитлиши, хитайниң уйғур райониға қаратқан юқири бесимлиқ контроллуқ сияситиниң йәниму күчийидиғанлиқидин дерәк бәрмәктә.

Хитай һөкүмити 2017-йили уйғур елида кәң көләмлик тутқунни йолға қоюп, лагерларға аз дегәндә икки милйон адәмни солаштин илгири аталмиш “әл райини билиш, әлгә нәп йәткүзүш” һәрикити қозғап, аз дегәндә 200 миң кадирни асасий қатламға әвәткән, хитай кадирлар билән уйғур деһқанлирини “қошмақ туғқан” болушқа мәҗбурлиған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.