Ma shingruy Uyghur élida siyasiy intizamni kücheytish seperwerlik herikiti qozghashni telep qilghan

Uyghur aptonom rayonluq partkomning sékritari ma shingruy 27-april küni ürümchide éilghan mexsus yighinda söz qilip, siyasiy intizamni kücheytish, xitay kompartiyesi merkiziy komitétining qarar we orunlashturushlirigha qet'iy emel qilishni tekitligen.

Xitayning “Tengritagh tori” ning xewer qilishiche, ma shingruy 27-aprél künidiki tekshürüsh xizmet yighini we Uyghur aptonom rayonluq partkomning birinchi nöwetlik tekshürüsh we seperwerlik orunlashturush yighinida söz qilghanda, xitay dölet re'isi shi jinpingning körsetmilirini qet'iy emeliyleshtürüsh we yéngi dewrdiki shinjangni idare qilish istratégiyesini toluq yolgha qoyushni tekitligen. U sözide yene “Siyasiy tekshürüshni chongqurlashturush, nazaret qilishni kücheytish, omumiyyüzlük we qattiq bashqurushni ilgiri sürüsh, partiyening nazaret sistémisini mukemmelleshtürüsh” heqqide noqtiliq toxtalghan.

U mundaq dégen: “Biz choqum siyasiy meydanimizda ching turushimiz, siyasiy intizam we siyasiy qa'idilerge qattiq ri'aye qilishimiz kérek. Tekshürüsh nazaretchiliki we bashqa nazaretchilikning bir gewdilishishini ilgiri sürüshimiz kérek. Belgilime, intizam we qanunlargha asasen tekshürüsh xizmitining barliq tereplirige birleshtürüp, kadirlarni tekshürüsh we terbiyelesh xizmitini keng qanat yaydurushimiz kérek.”

Melum bolushiche, ma shingruy chén chüen'goning ornigha Uyghur aptonom rayonluq partkomning sékritari bolup teyinlen'gendin buyan, Uyghur rayonining herqaysiy wilayet we oblastlirida arqa-arqidin xizmet tekshürüshi élip bérip, dölet xewpsizlikini qoghdash, rayonning muqimliqi we eminlikini saqlash, bölgünchilikke we ashqunluqqa zerbe bérish, islam dinini xitaychilashturush, “Jungxu'a milliti ortaq éngi” ni turghuzush, shinjangni medeniyet arqiliq ozuqlandurush, yerlik bilen bingtu'enni yughurush qatarliq xitayning Uyghur rayonini qattiqqolluq bilen idare qilish siyasetlirini yenimu kücheytken. Ma shingruy téxi aldinqi künila xoten wilayitini tekshürgende qilghan sözide xitay kompartiyesining 20-qurultiyining muweppeqiyetlik échilishi üchün Uyghur rayonida muqimliq we dölet xewpsizlikige heqiqiy kapaletlik qilishni tekitligen idi. Igilinishiche, nöwette ma shingruy her küni dégüdek Uyghur élida siyasiy muqimliqqa kapaletlik qilishni, rayonda yuqiri bésimliq siyasetni dawamlashturushni tekitlep, özining shi jinpinggha bolghan sadaqitini bildürüp kelmektiken.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar