Ма шиңрүй қизилсуға берип чегра мудапиәсини вә иҗтимаий муқимлиқни күчәйтишни тәләп қилған

Мухбиримиз әркин
2022-05-09
Share

Уйғур аптоном районлуқ парткомниң секретари ма шиңрүй 7-май күни қизилсу областиниң атуш, улуғчат қатарлиқ җайлирини зиярәт қилғанда чегра мудапиәсини күчәйтиш вә мустәһкәмләшни, бихәтәр иҗтимаий муқимлиқ муһити бәрпа қилишни тәләп қилған. Бу, хитайниң уйғурлар елидики чоң һоқуқлуқ мәзкур әмәлдариниң йеқинқи бир айдин бери 2-қетим уйғур елиниң чегра бойидики шәһәр, наһийәлирини зиярәт қилип, чеграни қоғдашни күчәйтишни тәкитлишидур. Буниң ‍алдида у хотәнни зиярәт қилип, чегра мудапиәсини вә иҗтимаий муқимлиқни техиму қаттиқ күчәйтишни тәкитлигән.

Ма шиңрүйниң немә үчүн арқа-арқидин чегра районға берип, чегра мудапиәси вә иҗтимаий муқимлиқни тәкитлишиниң сәвәби мәлум әмәс. У өткән йили уйғур аптоном районлуқ парткомниң секретарлиқиға йөткәп келингәндә хизмәтниң асаси нишанини иқтисади тәрәққиятқа қаритидиғанлиқидин бешарәт бәргән. Бәзи көзәткүчиләрниң ейтишичә, униң арқа-арқидин хотән вә қизил суни көздин кәчүрүп, чеграни қоғдашни тәкитлиши хитайниң украина уруши қизиған бир пәйттә һиндистан чеграси вә вахан каридориниң бихәтәрликидин әндишә қиливатқанлиқини көрситидикән.

Ма шиңрүй атуш, улуғчат қатарлиқ җайларда қилған сөзидә, ши җинпиңниң шинҗаңға алақидар бир қатар муһим сөз вә йолйоруқлирини, мәркәзниң 3-қетимлиқ шинҗаң хизмәт йиғининиң роһини, партийәниң йеңи дәврдики шинҗаңни идарә қилиш истратегийәсини толуқ вә тоғра йолға қоюп: “пүтүн күч билән дөләт бихәтәрлики, иҗтимаий муқимлиқ вә хәлқниң аманлиқини қоғдашни күчәйтиш, чеграни күчәйтиш, чегра мудапиәсини мустәһкәмләш вә чеграни гүлләндүрүп, хәлқни бейитиш, партийә 20-қурултийиниң ғәлибилик ечилиши үчүн бихәтәр вә муқим сиясий-иҗтимаий муһит бәрпа қилиш керәк” дегән.

“шинҗаң” гезитиниң ейтишичә, ма шиңрүй бу сәпиридә атуш шәһиридики тәкшүрүш понкитлирини, сүнтағ йезисидики сақчихана, улуғчатниң җиған йезисидики қирғизистан билән болған чеграни тәкшүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт