Ma shingruyning maqalisi Uyghur diyaridiki basturushning yenimu dawam qilidighanliqini jakarlidi
Xitay hökümitining Uyghur diyaridiki qirghinchiliq qilmishi xelq'arada zor tenqid we qismen jaza tedbirlirining otturigha chiqishigha seweb bolghandin kéyin, Uyghur aptonom rayonluq partkomning sékrétari chén chu'en'go 2021-yilining axiri wezipisidin qaldurulup, ornigha gu'angdong ölkisining bashliqi ma shingruy ishqa qoyulghan idi. Emma uning xizmetke chüshken deslepki birnechche ayda sözligen sözliri nöwettiki siyasiy tedbirlerni izchil ijra qilishtin bisharet bergen idi. 11-May küni ma shingruyning namida “Xelq géziti” we shinxu'a agéntliqining tor betliride élan qilin'ghan “Partiyemizning yéngi dewrdiki shinjangni idare qilish istratégiyesini toluq we toghra ijra qilayli” témisidiki bash maqalisi xitay hökümiti ötken besh yilda izchil dawam qildurup kelgen basturush we tutqun qilish siyasitining téximu qattiq ijra bolidighanliqini resmiy halda jakarlidi.
Bash maqalide Uyghur diyaridiki barliq siyasiy xizmetlerni xitay re'isi shi jinpingning “Bir qolluq layiheligenliki we orunlashturghanliqi, bu jaydiki xizmetning siyasiy jehettiki yétekchi idiyesi, meqsiti we buni emelge ashurushning charilirini aydinglashturup bergenliki” alahide tekitlen'gen. “Partiyemizning yéngi dewrde shinjangni idare qilish istratégiyesi” dep nam bérilgen bu istratégiyeni ma shingruy “Bizning buningdin kéyinki barliq xizmetlirimizning, ijtima'iy muqimliq we uzaq mezgillik eminlik berpa qilishning qiblinamisi. Biz buni qet'iy éghishmastin toluq we toghra ijra qilishimiz lazim,” dep körsetken.
Ma shingruy maqalisining “Shinjangni medeniyet arqiliq ozuqlandurushta qet'iy ching turup, idé'ologiye sahesidiki xizmetlerni yaxshi ishlesh” namliq üchinchi bölikide, “Idé'ologiye sahesidiki rehberlik hoquqini ching tutush؛ mes'uliyet tüzümini qet'iy izchillashturush؛ partiye bashqurushidiki teshwiqat, partiye bashqurushidiki idé'ologiye we partiye bashqurushidiki taratqularni asasiy éqimgha aylandurush؛ shinjangdiki her millet xelqide ‛weten éngi‚, ‛jungxu'a milliti éngi‚, ‛jungxu'a medeniyiti éngi‚ turghuzush؛ ‛jungxu'a klassik oqushluqliri qurulushi‚ we ‛radiyo-téléwiziye serxil eserliri arqiliq shinjangni medeniyet arqiliq ozuqlandurush qurulushi‚ ni keng kölemde élip bérish”, shundaqla atalmish “Jungxu'a kimliki asasidiki millet we din qarishini turughuzush” ni otturigha qoyghan.
Ma shingruy nöwettiki “Siyasiy istratégiye” ni ijra qilishni “Shinjangni qanun boyiche idare qilish”, “Ittipaqliq we inaqliq arqiliq shinjangning muqimliqqa ige qilish”, “Xelq ammisining turmushini yaxshilash” dégendek sho'arlar bilen niqablighan bolup, radiyomizning munasiwetlik ziyaretliri jeryanida herqaysi mutexessisler “Ittipaqliq” ning Uyghurlar shertsiz ré'aye qilidighan tür ikenliki, “Xelq ammisi” ning Uyghur diyarigha köchüp kelgen xitay aqqunlirini körsitidighanliqini alahide tekitligen idi. Yérim yildin buyan Uyghur diyaridiki herqaysi wilayet we sheherlerni, shuningdek herqaysi nazaret we idarilerni bir-birlep közdin kechürüp chiqqan ma shingruyning mezkur bash maqalisi nöwette uning bundin kéyinki sékrétarliq xizmitini qandaq ada qilish heqqidiki wedinamisi, dep qaralmaqta iken.
- Gülistan eziz: “Ikkinchi wetinim-yaponiyeni xitay tehtididin agahlandurush we qoghdash méning burchum”
- D u q pütün dunyadiki Uyghurlarni “5-Iyul ürümchi qirghinchiliqi” ning 13 yilliqini xatirileshke chaqirdi
- Türkiye bilen qazaqistanning b d t kishilik hoquq aliy kéngishining 50-qétimliq yighinida Uyghur mesilisini tilgha élishi némidin bisharet béridu?
- Xitay qaramayda tunji bolup sinaq qiliwatqan eqliy iqtidarliq charlighuchi mashina qandaq nerse?
- “Qanliq shawgu'en weqesi” ning 13 yilliq xatire küni: “Dunya bu weqeni untup qalmasliqi kérek”
