Ма шиңруй уйғур районидики коммунистик яш иттипақи әзалирини “биңтуән роһи” ни үлгә қилишқа чақирған

Мухбиримиз ирадә
2022-05-12
Share

Хитай компартийәси нөвәттә хитай коммунистик яшлар иттипақи қурулғанлиқиниң 100 йиллиқини тәбриклигән. 10-Май күни хитай дөләт рәиси ши җинпиң бу һәқтә мәхсус нутуқ сөзләп, яшлар иттипақи әзалириниң компартийәгә әгишип меңишини вә “хитай арзуси” ни әмәлгә ашуруш үчүн күрәш қилишини тәләп қилған.

Хитайниң “тәңритағ тори” ниң хәвиригә қариғанда, 11-май күни уйғур аптоном районлуқ парткомниң секритари ма шиңруй ши җинпиңниң хитай коммунистик яшлар иттипақи қурулғанлиқиниң 100 йиллиқини тәбрикләш йиғинида қилған муһим сөзиниң роһини йәткүзүш үчүн, уйғур аптоном районлуқ партком даимий һәйитиниң кеңәйтилгән йиғинини чақирған.

Ма шиңруй бу йиғинда “яшларни ши җинпиңниң тапшуруқини әстә чиң сақлаш, униң гепидин чиқмаслиқ, компартийәниң омумиййүзлүк рәһбәрликини коммунистик яшлар иттипақи хизмитиниң пүткүл җәряни һәмдә һәрқайси саһәлиридә әмәлийләштүрүш” ни тәләп қилған.

Диққәт қозғайдиғини шуки, ма шиңруй сөзидә “дөләтниң чоң иши”, “биңтуән роһи”, “тоғрақ роһи” дегәндәк мәхсус терминларни ишлитип, уйғур районидики яшларни мав зедуң дәвридики “чегра районни гүлләндүрүш” чақириқини еисдә чиң тутушқа үндигән.

У мундақ дегән: “коммунистик яшлар иттипақиниң асасий таянч қошун болуштәк ролини яхши җари қилдуруш керәк. Шинҗаңниң әмәлийитигә зич бирләштүрүп, кәң иттипақ әзалири вә яшларни ‛дөләтниң чоң иши‚ ни қәлбигә пүкүп, бурч вә мәсулийитини зиммисигә елишқа йетәкләш керәк. ‛тоғрақ роһи‚ вә ‛биңтуән роһи‚ ни әвҗ алдуруп, йеңи дәврдики партийәниң шинҗаңни идарә қилиш тәдбирлирини толуқ изчиллаштурушқа һәқиқий түрдә капаләтлик қилип, яшларни шинҗаңниң ислаһат, тәрәққият, муқимлиққа аит түрлүк ишлирини алға силҗитиштики җәңгивар қошун болушқа йетәкләш керәк.”

Хитайниң уйғур районидики ғәйрий рәсмий армийәси болған биңтуән 1950-йилларниң башлирида қурулғандин буян, уйғур елидики әң мунбәт йәрләрни вә су мәнбәлирини игиливелиш, тоғрақ вә йепинча өсүмлүкләрни вәйран қилип боз йәр ечиш, шәһәрләштүрүш, шундақла бу шәһәрләргә зор миқдарда хитай аһалилирини көчүрүш арқилиқ, хитайниң уйғурларни өз земинида аз санлиқларға айландуруп йоқитиштин ибарәт ишғал сияситидә авангартлиқ рол ойнап кәлгән иди.

Америкадики уйғур зиялийси елшат һәсән әпәндиниң көрситишичә, ма шиңруй дәватқан “биңтуән роһи” вә “тоғрақ роһи” дегән аталғулар хитайниң ишғалийәтчилик маһийитини көрсәтсә, “дөләтниң чоң иши” дегини уйғурларниң бу райондики йилтизини қурутуш арқилиқ, уйғур районини “хитайниң әбәдий айрилмас бир парчисиға айландуруш” истратегийәсини көрситидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт