Ма шиңруй уйғур районида “шинҗаң тәшвиқати идийәси” шәкилләндүрүшни оттуриға қойған

Мухбиримиз ирадә
2022.05.19
Share on WhatsApp
Share on WhatsApp

Уйғур аптоном районлуқ парткомниң секритари ма шиңруй уйғур елида сиясий тәшвиқат вә идийәви хизмәтниң йеңи дәврини ечиш һәққидә сөз қилған.

У уйғур райониниң “муқимлиқи” вә “әбәдий әминлики” ни сақлаш үчүн мәхсус “шинҗаң тәшвиқати идийәси” шәкилләндурушни тәкитлигән болуп, уйғур районидики тәшвиқат аппаратлириниң мушу идийәни қорал қилип, хизмәт қилиши керәкликини билдүргән.

У хитай компартийәсиниң “орган вә партийә қурулуши тәтқиқати” сәһиписидә елан қилған мақалисидә мундақ дегән:

“биз асасий еқимдики идийә вә җамаәт пикирини техиму күчлүк тәшвиқ қилишимиз керәк. Асасий темини актиплиқ билән илгири сүрүп, тема тәшвиқати, вәзийәт тәшвиқати, сиясәт тәшвиқати, мувәппәқийәт тәшвиқати вә типик тәшвиқатларни қанат яйдурушимиз керәк. Интернетни тошуғучи сүпитидә яхши ишлитип, аптоном райондики муһим хәвәр тор бекәтлириниң қурулушини күчәйтип, интернетни тәшвиқатниң муһим тошуғучисиға айландурушимиз керәк.”

У уйғур елидики ахбарат вә тор учур саһәсини ғәрб ахбарати билән куч синишишқа тәрғип қилған булуп, “районда барлиққа кәлгән зор тәрәққиятларни, хәлқниң бәхтияр турмушини, партийә вә һөкүмәтниң яхши сиясәтлирини көпләп тәшвиқ қилиш керәк,” дегән.

Уйғур дптоном районлуқ парткомниң секритари ма шиңруй йеқиндин буян һәдәп хитай рәиси ши җинпиңниң көрсәтмиси бойичә иш қилиш, “җуңхуа арзуси” ни әмәлгә ашуруш, “чоң пиланни ишқа ашуруш” дегәндәк мәзмунларда сөз қилип, өзиниң уйғур елида йолға қоюлуватқан ирқий қирғинчилиқ вә инсанийәткә қарши җинайәтлирини йәниму қаттиқ давамлаштуридиғанлиқиниң сегналини берип кәлмәктә.

Ма шиңруй бу мақалисидә йәнә аталмиш “‛җуңхуа миллити ортақ гәвдиси еңи‚ ни шәкилләндүрүш, тоғра болған дөләт қариши, тарих қариши, милләт қаришини турғузуш, җуңхуа мәдәнийити еңини шәкилләндүрүш” һәққидә сөз қилған. Униң аталмиш “җуңхуа миллити ортақ гәвдиси” шоарини қайта тәкитләп, хитайда бир дөләт, бир милләт вә бир мәдәнийәт барпа қилиш чақириқини тилға елиши, көзәткүчиләрниң күчлүк диққитини қозғимақта.

Доктор әркин әкрәм радийомизға қилға сөзидә ма шиңруйниң бу сөзлири бир яқтин униңму чен чүәнгодин пәрқсиз бир хитай әмәлдари икәнликини ипадилисә, йәнә бир яқтин униң кейинки нөвәтлик партийә қурултийида хитай компартийәси сиясий бюросиниң даимий азалиқиға кириштәк сиясий ғәризини намайән қилип бериду, дегән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.