Ма шиңруйниң саяһәт вә қуруқлуқ портлирини тәкшүрүши немини көзләйду?

Вашингтондин мухбиримиз әзиз тәйярлиди
2024.05.21

Уйғур дияридики қирғинчилиқниң баш иҗрачилиридин бири дәп қаралған ма шиңруй йеқинда “шинҗаң мәдәнийәт саяһәтчилик мәбләғ селиш ширкити”, үрүмчи шәһәрлик хәлқара қуруқлуқ порти қатарлиқ җайларда “хизмәтләрни көздин кәчүрүш” тә болған һәмдә бу орунларниң бундин кейинки хизмәтлири үчүн бир қисим йолйоруқларни бәргән.

Хитай башқурушидики “тәңритағ тори” ниң бу һәқтики хәвиридә ейтилишичә, ма шиңруй бу қетимқи хизмәт тәкшүрүши җәрянида ташқи алақә вә маддий әшяларниң оборот қилиниш әһвали қатарлиқларни сүрүштә қилған, шуниңдәк “шинҗаңниң мәдәнийәт саяһәтчиликини юқири сүпәттә тәрәққий қилдуруп, ғәрбкә қаритилған ечиветишниң көлими вә дәриҗисини үзлүксиз йүксәлдүрүш лазим” дегән. Үрүмчи шәһәрлик хәлқара қуруқлуқ портида болса йәрлик алаһидиликни толуқ җари қилдуруп, қуруқлуқ йоли арқилиқ мал йөткәштики риқабәттә башламчи болушни тәкитлигән.

Йеқинқи йиллардин буян уйғур дияридики қирғинчилиқ хәлқарада зор тәнқидләргә дуч келишкә башлиған һаман хитай һөкүмити тездин “шинҗаң һәққидики һекайиләрни яхши сөзләш” дегәндәк түрлүк тәшвиқат паалийәтлирини башливәткән һәмдә өзлириниң қирғинчилиқ қилмишини пәрдазлашқа өткәниди. Һалбуки уйғур кишилик һоқуқ қурулуши қатарлиқ тәшкилатлар чиқарған доклатларда хитай һөкүмитиниң бу хилдики саяһәткә тәшкилләш паалийәтлири бирдәк “қирғинчилиқ саяһити” дәп әйибләнгәниди. Бу җәһәттә хитай дуч кәлгән йәнә бир “өткүр миқ” дәл америка базириға кириватқан мәһсулатларниң уйғур мәҗбурий әмгики билән алақидар болуш-болмаслиқи һәққидики өткәл болуп, бу сәвәбтин биңтүәнниң ташқи сода експорти зор тәсиргә учрашқа башлиған. Ма шиңруйниң бу қетимқи нәқ мәйдан йолйоруқлири дәрвәқә бу хил реаллиқниң муәййән инкаси, дәп қаралмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.