Ma shingruyning sayahet we quruqluq portlirini tekshürüshi némini közleydu?

Washin'gtondin muxbirimiz eziz teyyarlidi
2024.05.21

Uyghur diyaridiki qirghinchiliqning bash ijrachiliridin biri dep qaralghan ma shingruy yéqinda “Shinjang medeniyet sayahetchilik meblegh sélish shirkiti”, ürümchi sheherlik xelq'ara quruqluq porti qatarliq jaylarda “Xizmetlerni közdin kechürüsh” te bolghan hemde bu orunlarning bundin kéyinki xizmetliri üchün bir qisim yolyoruqlarni bergen.

Xitay bashqurushidiki “Tengritagh tori” ning bu heqtiki xewiride éytilishiche, ma shingruy bu qétimqi xizmet tekshürüshi jeryanida tashqi alaqe we maddiy eshyalarning oborot qilinish ehwali qatarliqlarni sürüshte qilghan, shuningdek “Shinjangning medeniyet sayahetchilikini yuqiri süpette tereqqiy qildurup, gherbke qaritilghan échiwétishning kölimi we derijisini üzlüksiz yükseldürüsh lazim” dégen. Ürümchi sheherlik xelq'ara quruqluq portida bolsa yerlik alahidilikni toluq jari qildurup, quruqluq yoli arqiliq mal yötkeshtiki riqabette bashlamchi bolushni tekitligen.

Yéqinqi yillardin buyan Uyghur diyaridiki qirghinchiliq xelq'arada zor tenqidlerge duch kélishke bashlighan haman xitay hökümiti tézdin “Shinjang heqqidiki hékayilerni yaxshi sözlesh” dégendek türlük teshwiqat pa'aliyetlirini bashliwetken hemde özlirining qirghinchiliq qilmishini perdazlashqa ötkenidi. Halbuki Uyghur kishilik hoquq qurulushi qatarliq teshkilatlar chiqarghan doklatlarda xitay hökümitining bu xildiki sayahetke teshkillesh pa'aliyetliri birdek “Qirghinchiliq sayahiti” dep eyiblen'genidi. Bu jehette xitay duch kelgen yene bir “Ötkür miq” del amérika bazirigha kiriwatqan mehsulatlarning Uyghur mejburiy emgiki bilen alaqidar bolush-bolmasliqi heqqidiki ötkel bolup, bu sewebtin bingtüenning tashqi soda éksporti zor tesirge uchrashqa bashlighan. Ma shingruyning bu qétimqi neq meydan yolyoruqliri derweqe bu xil ré'alliqning mu'eyyen inkasi, dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.